Ekonomi

ATK-ja në përkrahje të prodhimit vendor

Autori: Gazeta inFokus 14:55 | 26 February 2018

Për të stimuluar prodhuesit vendor e për të rritur qarkullimin e prodhimeve vendore brenda dhe jashtë vendit, Administrata Tatimore e Kosovës ka bërë lehtësira tatimore për biznese, shkruan Infokusi.com.

Këto lehtësira kanë të bëjnë me lirim nga TVSH-ja për importimin e lëndës së parë dhe pajisjeve të teknologjisë informative. E numri i bizneseve që kanë aplikuar për tu liruar nga tatimi po del të jetë kogja i madh.

Vetëm në vitin 2018, më shumë se 270 biznese kanë përfituar nga këto lehtësira, e 79 të tjera janë në proces të trajtimit.

-Advertisement-

Mirëpo, ka edhe biznese që u janë refuzuar kërkesat. 5 biznese nuk kanë pasur mundësi që të përfitojnë për shkak se kërkesat u janë refuzuar.

“Nga fillimi i vitit 2018 e deri më tani numri i kërkesave të shqyrtuara për lirim të TVSH-së në importimin e lëndës së parë dhe pajisjeve të teknologjisë informative është 356, prej tyre 346 kërkesa janë për lirim të lëndës së parë dhe 10 për pajisjet e teknologjisë informative”, thuhet në komunikatën që ka lëshuar ATK-ja për media.

2018-a nuk është viti i parë që ATK-ja po i ndihmon këto biznese. Këto maa lehtësuese ATK-ja i kishte aplikuar edhe në vitin që lamë pas. Në 2017 ishin pranuar 234 kërkesa, ndërsa ishin refuzuar 7 kërkesa, shkruan Infokusi.

“Gjatë vitit 2017 nga Administrata Tatimore e Kosovës janë shqyrtuar 241 aplikacione, prej tyre 226 aplikacione për lirim të TVSH-së në importimin e lëndës së parë, si dhe 15 aplikacione për pajisje të teknologjisë informative”, thuhet më tej në këtë komunikatë./INFOKUSI/.