Për të shtatën herë radhazi Grupi i Shoqërisë Civile për grumbullimin e dëshmive për krime lufte dhe përgatitjen e kallëzimeve penale kundër kriminelëve serbë gjatë luftës 1998/99 i ka dorëzuar në Prokurorinë Speciale të Kosovës, 61 kallëzime penale kundër kriminele serbe.

Sipas kësaj shoqërie civile kriter për një marrëveshje mes Kosovës dhe Serbisë duhet të jetë dënimi i kriminelëve serbë që kanë kryer krime gjatë luftës së fundit në Kosovë.

Anëtarja e grupit, Mevlyde Mezini Saraçi u shpreh se nëse ndodh pajtimi i Kosovës me Serbinë, atëherë bëhet barazimi i krimeve e kjo, sipas saj, çon në kriminalizimin e Qeverisë së Kosovës.

-Advertisement-

“ Këtu është edhe çelësi i suksesit së bisedimeve, sepse nëse nuk bisedohet për dënimin e kriminelëve dhe Serbia nuk kërkon falje publike, dhe nuk i sjell eshtrat e të gjithë të zhdukurve nuk ka me pas marrëveshje. Le të urdhërojnë dhe le të vijnë delegacioni i bisedimeve në Gjakovë, në Drenicë, në Malishevë në të gjitha trevat ku ka pasur krime dhe atje le të marrin informacionet e drejta se si duhet të përmbyllen bisedimet me Serbinë me sukses. Gjithsesi, sepse ne po shohim nga informacionet e fundit se po kërkojmë me ngazëllim një pajtim me Serbinë, po i barazojmë krimet, ne jemi viktima, ata janë kriminelë, andaj barazimi i krimit e kriminalizon edhe Qeverinë e Kosovës”, u shpreh ajo.

Udhëheqja e këtij grupit, Shkendije Hoda, u shpreh se gjatë ditës së sotme në Departamentin për Krime Lufte pranë Prokurorisë Speciale i kanë dorëzuar 61 dosje të pajisura me 100 dëshmi.

Hoda u shpreh se dorëzimi i këtyre dosjeve po gjen interes për trajtim edhe nga policia , pasi që njësiti policor i Gjakovës ka filluar të marrë në pyetje dëshmitarët.

“Është kontingjenti i shtatë që ne sot e dorëzojmë në Prokurorinë Speciale, departamenti I krimeve të luftës. Janë diku 61 dosje me 100 dëshmi, ne po vazhdojmë ende të marrim dëshmi nga qytetarët e Komunës së Gjakovës, gjë që po shohin se kemi përkrahjen e prokurorisë dhe policisë për krime lufte. Te ne në komunën e Gjakovës vetëm ka filluar që policia e krimeve të luftës t’i marrë dëshmitarët në pyetje dhe kjo është një sukses do të thotë se shihet që është interesi jo vetëm për qytetarin, por dhe për vetë shtetin”, u shpreh ajo.

Grupi i Shoqërisë Civile për grumbullimin e dëshmive për krime lufte dhe përgatitjen e kallëzimeve penale kundër kriminelëve serbë gjatë luftës 1998/99 ka paralajmëruar edhe dorëzimin e dëshmive të tjera gjatë viteve të ardhshme.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-