Ekonomi

Prodhuesit kosovarë vazhdojnë të kenë vështirësi në eksportimin e produkteve

Autori: Gazeta inFokus 16:20 | 14 March 2018

Klubi i Prodhuesve të Kosovës njofton që vazhdojnë vështirësitë e prodhuesve Kosovar në eksportimin e produkteve të tyre në tregjet e rajonit.

Në një komunikatë për media, Klubi i Prodhuesve të Kosovës si pengesë e radhës për këta prodhues përmend kërkesat për dokumente shtesë, të cila janë vetëm një ndër barrierat e shumta që iu vihen prodhuesve të Kosovës.

“Rasti i fundit ka të bëjë me eksportimin e materialit ndërtimor nga argjila, siç janë bllokat, oxhaqet, kanaloret, montat dhe produktet të tjera nga ky material për në tregun e Maqedonisë. Duhet të theksohet fakti se këta prodhues kanë pasur shkëmbime të rregullta me tregun maqedonas dhe deri më tani kanë nuk kanë pasur probleme të tilla”, thuhet në komunikatë.

-Advertisement-

Ditëve të fundit doganat e Maqedonisë, kanë filluar që këtyre prodhuesve t’iu kërkojnë dokumente shtesë, apo më saktë edhe certifikatën CE Mark.

Klubi i Prodhuesve të Kosovës sqaron se një certifikatë e tillë është e kërkuar vetëm nga vendet e BE-së, por jo edhe nga vendet e CEFTA-së, andaj kërkon reagimin e institucioneve të Kosovës për të bërë presion në autoritetet e Maqedonisë për largimin e barrierave dhe respektimin e marrëveshjes CEFTA.