Ekonomi

Gjobën për mashtrim të “Viva Fresh Store” e paguajnë punëtorët

Autori: Gazeta inFokus 10:20 | 03 March 2018

Punëtorëve të “Viva fresh Store”, menaxhmenti ua ka ndalur nga paga paratë për t’ia paguar Inspektoratit të Tregut gjobën që ia shqiptoi ditë më parë për mashtrim të konsumatorëve.

Një nga punëtorët e kësaj kompanie ka treguar për Infokusin se në pagën e muajit shkurt i janë ndalur 8 euro në emër të kësaj gjobe.

Varësisht nga pozita e punës, siç tregon ai, të tjerëve u janë ndalur edhe më shumë para.

-Advertisement-

Infokusi ka kërkuar nga zyrtarët e “Viva Fresh Store”, përgjigje rreth arsyes së gjobës dhe se pse punëtorëve po u zbriten pagat, askush nuk është përgjigjur.

Infokusi është ende në pritje të përgjigjeve nga ky market.

Mediet raportuan se Inspektorati i Tregut kishte konstatuar se blerja në “Viva Fresh”, saktësisht në pikën e shitjes në rrugën “Ahmet Krasniqi” në Prishtinë ka dalë të jetë një mashtrim për konsumatorët, të cilëve nëpër rafte të produkteve u ekspozohet një tjetër çmim, por kur shkojnë te arka paguajnë tjetër çmim.

E për këtë, Inspektorati i Tregut e ka gjobitur me 1 mijë euro këtë kompani, pasi ka gjetur se çmimi i disa produkteve ka qenë mashtrim i konsumatorit. Kjo kishte ndodhur në dhjetor të vitit 2017. /Infokusi/