Lajme

Rita po vjen, Rita s’po vjen

Autori: Gazeta inFokus 16:59 | 12 February 2018

Asgjë duket se nuk po i ecë mbarë Qeverisë së Kosovës në 10 vjetorin e pavarësisë. Koncerti i parë me të cilin do të hapej festa dhjetë ditore e një dekade të Kosovës shtet u anulua pa dhënë ndonjë shpjegim, dekorimet në sheshin kryesor të Prishtinës u dëmtuan nga era, shkruan Infokusi.com

Edhe flamuri Kosovës në përmasa gjigante u hoq nga objekti i Qeverisë pasi u dëmtua nga era, derisa të gjitha institucionet qendrore janë dorëzuar para kryetarit të Komunës së Prishtinës, Shpend Ahmeti për vendosjen e flamurit të shtetit më të ri në Evropë tek rrethi në Prishtinë.

E kulmi i të këqijave në prag të kësaj feste duket të jetë anulimi i koncertit të këngëtares me famë botërore, Rita Ora.

-Advertisement-

Krejt kjo pasi Kabineti i kryeministrit, Ramush Haradinaj nuk është mbledhur për të ndarë buxhet për organizimet e 17 shkurtit.

Deri tani vetëm vendosje e dekorimeve në qendër të Prishtinës ka filluar dhe mbaruar në kohën e planifikuar. Gjithçka tjetër ose nuk kishte nisur fare ose kishte dështuar në hapin e parë.

Të shtunën (10 shkurt) ishte planifikuar nisja e programit festiv, me një koncert gjigant. Në sheshin “Zahir Pajaziti” në Prishtinë ishte vendosur bina ndërsa ekipe teknike dhe policë të Kosovës shiheshin gjithandej por ata që mungonin ishin qytetarët dhe këngëtarët.

U lajmërua se koncerti dështoi për shkak të motit me shi por u vë në dyshim edhe mospjesëmarrja e këngëtarëve të paralajmëruar për atë natë.

Paralajmërimi se Rita Ora më 17 shkurt do të vije në Kosovës është një tjetër dështim i Qeverisë së Kosovës.

Portali “Infokusi” mëngjesin e sotëm kishte raportuar se koncerti i Ritës me shumë mundësi nuk do të mbahet për shkak të mos aprovimit të buxhetit nga Qeveria e Kosovës.

Zëvendësimi i flamurit kombëtar me atë të Kosovës nuk ka ndodhur ende në vendin e quajtur te rrethi në Prishtinë. Pavarësisht që u paralajmërua se ky zëvendësim do të ndodhë shumë shpejtë./INFOKUSI/

Subscribe në YouTube: GAZETA INFOKUSI