Ekonomi

KQZ-ja kërkon buxhet shtesë për komisionerët që mbetën pa u paguar

Autori: Gazeta inFokus 11:36 | 10 February 2018

Komisioni Qendror i Zgjedhjeve i ka kërkuar Ministrisë së Financave buxhet shtesë në shumën prej 140 mijë euro për të paguar 1 mijë e 671 persona, të cilët u angazhuan si komisionerë apo si staf tjetër në procesin zgjedhor të vitit 2017.

Kjo është bërë e ditur nga Zëdhënësi i KQZ-së, Valmir Elezi. Sipas tij, listat me emrat e anëtarëve të Këshillave të Vendvotimit (komisionerët) dhe të stafit tjetër të angazhuar në Zgjedhjet Lokale 2017 janë dërguar në Ministrinë e Financave për t’iu transferuar mjetet. Ndaj pjesës dërmuese të tyre, me kohë, janë kryer obligimet.

“Pra, po flasim për rreth 50 mijë persona. Nga numri i përgjithshëm i tyre, janë vetëm 1 mijë e 671 persona të cilët nuk kanë marrë pagesën për angazhimin e tyre, për arsye të ndryshme.

-Advertisement-

“Për të kryer këto obligime të bartura nga viti Komisioni 2017, Komisioni Qendror i Zgjedhjeve ka kërkuar buxhet shtesë nga Ministria e Financave. Në total obligimet e bartura për pagesën e 1 mijë e 671 personave (komisionerë, K-Vote dhe staf i QNR-së) dhe kthimet që janë bërë nga bankat (për shkak të gabimeve në llogari bankare të tyre) llogariten të jenë 140 mijë euro”, ka shtuar Elezi.

Ai ka sqaruar se duhet pasur parasysh se Zgjedhjet Lokale janë mbajtur në fund të vitit dhe në rrethana të tilla e kanë të pamundur të mos kenë obligime të bartura në vitin tjetër.