Lajme

Të hënën nis ndërtimi i Shkollës në fshatin e Kadri Veselit që kushton 1.2 milion euro

Autori: Gazeta inFokus 12:26 | 01 June 2017

Në fshatin Braboniq, në të cilin ka lindur shefi i PDK-së Kadri Veseli, të hënën do të nisë ndërtimi i shkollës fillore që kushton 1.2 milion euro dhe financohet direkt nga Ministria e Arsimit, të cilën e udhëheq zyrtari i lartë i kësaj partie, Arsim Bajrami. Për projektet në komunat që udhëheq LDK-ja po angazhohet kryesisht ministri Lutfi Zharku. Edhe LVV-ja, edhe AAK-ja këto ditë kanë kontraktuar projekte të mëdha në Prishtinë, në Deçan, …

Ministria e Arsimit është kujdesur që t’ua ndërtojë një shkollë supermoderne, në vlerë prej hiç më pak se 1.2 milion eurosh, bashkëfshatarëve të kryetarit të PDK-së Kadri Veselit. Të hënën e ardhshme, gjashtë ditë para se të votohet për zgjedhjet e përkohshme parlamentare, kompania që e ka fituar tenderin “Standard Plus” do t’ia nisë punimeve për ndërtimin e objektit të shkollës fillore në Braboniq të Mitrovicës, fshat ky në të cilin ka lindur kryeparlamentari Kadri Veseli, shkruan gazeta Zeri.

Vlen të ceket se edhe pse është në komunë të Mitrovicës, e cila udhëhiqet nga Agim Bahtiri i AKR-së, ky projekt është financuar nga Ministria që drejtohet nga Arsim Bajrami, kandidat për deputet të PDK-së. Për ndërtimin e një shkolle kaq moderne, e cila nuk është ndërtuar as në qendrat më të mëdha të Kosovës, kontrata është nënshkruar gjatë muajit të kaluar (prill), derisa fillimi i punimeve është neglizhuar deri në afatin e mbajtjes së zgjedhjeve, ndonëse një gjë e tillë është mohuar nga kompania kontraktuese.

-Advertisement-

“Punimet nuk janë vonuar për shkak të zgjedhjeve, por na kanë dalë si punë të tjera. Kështu që të hënën e ardhshme planifikojmë t’i fillojmë punimet në ndërtimin e shkollës së re në Braboniq”, ka deklaruar përmes telefonit për gazetën “Zëri” Dedë Nikollaj, inxhinier në kompaninë punëkryerëse.

Projekt i njëjtë për ndërtimin e shkollës fillore “Q. Ilazi” është nisur edhe në Kaçanik, komunë kjo ku udhëheq PDK-ja. Tenderin në vlerë prej 1.1 milion eurosh e ka fituar po ashtu nga Ministria e Arsimit kompania “Ada Consulting”.

Subscribe në YouTube: GAZETA INFOKUSI