Ndoshta keni vërejtur që akti i vogël i josinqeritetit te disa njerëz me kohë bëhet edhe më i madh. P.sh., personi i cili është i prirë të thotë të pavërteta të vogla, suptile, – gradualisht fillon të shpikë gënjeshtra gjithnjë e më të mëdha, pa fije turpi.

Ekspertët konstatojnë që për këtë ekziston shkaktari biologjik, transmeton Telegrafi.

“Çdo gënjeshtër, sado të vogël që e themi, e ushtron trurin tonë që të lejojë josinqeritetin, andaj në këtë mënyrë në të ardhmen edhe më lehtë të themi të pavërteta edhe më të mëdha”, theksohet në një studim i cili tërheq vërejtjen që josinqeriteti mund të çojë në krimetë mëdha.

Studimet e reja, duke u mbështetur në të dhënat empirike, konstatojnë që shpeshtësia e thënies së gënjeshtrave dhe e sjelljeve të pandershme shtohet për shkak të përsëritjeve, andaj në të ardhmen do të thellohen gjithnjë e më shumë.

Shkencëtarët kanë konstatuar që çdoherë kur dikush e thotë ndonjë gënjeshtër, ndodhin ndryshime brenda trurit.

Në të vërtetë, me përsëritjen e gënjeshtrave zvogëlohet ndjeshmëria në pjesën amigdale (grup nervash të lidhura me ndjenjat), të cilat fillojnë të reagojnë më pak ndaj gënjeshtrave dhe josinqeritetit. Në këtë mënyrë gënjeshtra bëhet e lehtë për individin, sepse trurin e tij tashmë e ka “mashtruar”.

Eksperimenti për matjen e josinqeritetit

Shkencëtarët në eksperimentin e tyre për matjen e josinqeritetit kanë përfshirë 80 pjesëmarrës në çifte të ndara. Ata kanë marrë për detyrë që të luanin lojën në të cilën njëri person do t’ia transmetonte informacionin e caktuar personit tjetër, me ç’rast do të përfitonin një dobi të caktuar njëri apo të dy pjesëmarrësit.

Loja ka qenë mjet për studimin e integritetit të pjesëmarrësve.

Rezultatet kanë treguar që pjesëmarrësit kanë qenë të prirë të mashtrojnë në raste kur të dy fitonin ndonjë dobi pas lojës.

Për shkencëtarët fakti më mbresëlënës ishte ai që në fillim të gjithë pjesëmarrësit ishin të gatshëm të thoshin gënjeshtra të vogla në dobi të tyre, mirëpo gradualisht, duke avancuar loja, edhe gënjeshtrat filluan të rriteshin.

Një vërejtje miqësore

Dr. Tali Sharlot gjithashtu thekson që në mënyrë empirike mund të konstatojmë ekzistencën e mekanizmit biologjik.

“Qoftë kur është fjala për tradhtinë, josinqeritetin, dopingun apo mashtrimin financiar, mashtruesit shpesh thonë që aktet e tyre të vogla të josinqeritetit me kalimin e kohës janë përshkallëzuar, dhe se befasisht janë gjendur në situata që të bënin edhe krime të mëdha”.