Prokuroria e Përgjithshme kërkon pyetjen si dëshmitarë në Gjykatën e Lartë të Presidentit të zgjedhur, Ilir Meta, Kryeministrit Edi Rama, ishkryeministrit Sali Berisha dhe ish­ministrit të Brendshëm, Saimir Tahiri, shkruan “Panorama”.

Ata janë pjesë e listës me 53 dëshmitarë në total të kërkuar nga organi i akuzës në procesin gjyqësor në ngarkim të deputetit Tom Doshi, ish­deputetit Mark Frroku dhe Durim Bamit, të cilët po gjykohen për akuzën e “kallëzimit të rremë”. Sipas Prokurorisë, në vitin 2014 ata kanë “fabrikuar” prova të rreme për një skenar eliminimi të deputetit Doshi. Gjykata e Lartë çeli dje shqyrtimin gjyqësor ndaj tyre. Në seancën ku tre të pandehurit nuk ishin prezentë dhe përfaqësoheshin me avokatë, Kolegji Penal u njoh me kërkesën për gjykim, si edhe listën e provave të kërkuara nga ana e prokurorit dhe të avokatëve mbrojtës.

Të 53 dëshmitarët e prokurorisë u kërkua të pyeten si të tillë edhe nga mbrojtësi i deputetit Doshi. Njëkohësisht, avokati kërkoi si dëshmitar Prokurorin e Përgjithshëm, Adriatik Llalla. Pasi u njoh me parashtrimet hyrëse të palëve, Kolegji Penal i Gjykatës së Lartë e shtyu seancën për më 17 maj, ku do të shprehet në lidhje me pranimin apo jo të kërkesave.

-Advertisement-

DESHMITARET

Në listën e dëshmitarëve të kërkuar nga Prokuroria spikasnin krerët e politikës aktuale shqiptare, ndërkohë që në të gjenden dhe deputetë, si Spartak Braho, Petrit Vasili e Monika Kryemadhi, ish­drejtues të Policisë dhe biznesmenë të ndryshëm. Prokurori Adnand Xholi i tha Kolegjit Penal se përmes pyetjes së këtyre dëshmitarëve, dhe provave të tjera në proces, do të vërtetohen njohjet mes dëshmitarëve me të pandehurit, veprimet kriminale të kryera nga të pandehurit, momentet kur dhe si janë vënë në dijeni në lidhje me “pretendimet” e të pandehurit Tom Doshi rreth kësaj ngjarjeje, apo se çfarë kanë diskutuar në takimet mes tyre.

“Me këto deklarime do të vërtetojmë para gjykatës se nuk ka ekzistuar ndonjë plan për eliminimin fizik të të pandehurit Tom Doshi. Ndërkohë do vërtetohet bashkëpunimi mes tre të pandehurve Tom Doshi, Mark Frroku dhe Durim Bami, në krijimin e provave të rreme me qëllim për të ushtruar ndjekje penale ndaj kryetarit të Kuvendit, deklaruesit Ilir Meta, si edhe personave të tjerë”, tha prokurori Xholi. Lista e gjatë e dëshmitarëve të kërkuar u shoqërua me replika mes prokurorit dhe një prej anëtarëve të Kolegjit Penal. Gjyqtari pyeti prokurorin nëse të gjithë dëshmitarët janë të nevojshëm, me pretendimin se duhet të mendonin edhe për ekonominë gjyqë­ sore. “Derisa i kam kërkuar, për ne janë të gjithë të nevojshëm”, u përgjigj prokurori Xholi.

MBROJTJA

Avokati Vladimir Meçi tha në seancë se akuza e ngritur ndaj deputetit Tom Doshi nuk qëndron dhe se ai është i pafajshëm. “Tom Doshi ka pasur bindje se situata ndaj tij ishte reale dhe për këtë ai ka marrë masa për të mbrojtur veten”, tha mbrojtësi. Përveç pyetjes si dëshmitar të kryeprokurorit Llalla, avokati kërkoi edhe ballafaqimin në sallën e gjyqit mes Doshit dhe ish­ministrit Tahiri, si dhe ballafaqim mes Doshit dhe ish­drejtorit të Policisë së Shtetit, Artan Didi, dhe ishkreut të Policisë së Tiranës, Ardian Çipa. Sipas avokatit, ka pasur qëndrime të kundërta nga ana e ish­zyrtarëve të lartë të Ministrisë së Brendshme dhe Policisë. Në emër të të pandehurit Mark Frroku, avokati Tonin Prendi konfirmoi para Kolegjit Penal qëndrimin mohues në lidhje me akuzën. “Mark Frroku ka mohuar që t’i ketë thënë Tom Doshit dijeninë për ekzistencën e një plani eliminimi fizik ndaj tij. Ndërsa avokati Ilir Murati, mbrojtës i të pandehurit Durim Bami, i tha Kolegjit Penal se në seancat në vijim i mbrojturi prej tij do të paraqitet vetë për të shprehur qëndrimin ndaj akuzës së ngritur.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-