Shapkat e nipit i ka ende në mes të dhomës, mu në vendin kur e pa për herë të fundit. Në vërshimet në nëntor të vitit 2023, Milaim Ademaj humbi nipin 5 vjeçar dhe gruan e djalit. Por përpos se me dy njerëz të zemrës më pak, familja Ademaj mbeti edhe pa shtëpi.

Një vit më pas, gjendja e saj i ngjason kohës së luftës e banesa me qira ku gjendet aktualisht, është e treta që ndërron brenda vitit.

‘Prej asaj dite jem me qera, kam nejt me javë me hotel po me familjar dikur dolëm me qera… jam në një gasonier vet i 5-ti. Këtu s’ka jetesë më. Duhet të rrënohet Nuk na ndolën në ndihmë, po e shihni edhe vet si është gjendja. A jetohet me qera? Jam me dy jetimë që i rriti, janë në shkollë e çerdhe. Të gjitha janë shpenzime. Veç ‘po’ po thonë. Jemi bërë si top futbolli. Peja na gjuan në Prishtinë, Prishtina në Pejë. Komuna thotë s’kemi të bëjmë asgjë e Qeveria s’di çka po bën. Desha të rrënojë se s’po mund ta shohë më. I kam dy viktima këtu e kam kujtime të këqija”, ka theksuar Milaim Ademaj, familjar i dy viktimave nga vërshimet.

Që nga ajo ditë, Milaimi me 10 anëtarë të tjerë të familjes jetojnë me qira, në pritje të realizimit të premtimeve për një zgjidhje më të qëndrueshme.

Por i zhgënjyer, ai thotë se tanimë ai dhe shumë të tjerë në këtë gjendje janë harruar.

E kërkesën që e ka tash e një vit, ai po e drejton edhe një herë.

“Me ndihmu kishim bërë zgjidhje, do blenim ndonjë banesë ose diçka, troll me maru diçka, diku ku t’jetojmë. Po me ma jep mallin e botës s’më shërben gjë. Sa herë vi kam vetëm kujtime të këqija. Qeveria na ka harruar. Këndej po thonë ju kem në mend, po asgjë”, ka thënë ai.

Nusja e familjes Ademaj ishte gjetur tri shtëpi më poshtë, në atë të familjes Osa.

Edhe ata kanë po të njëjtin hall me qiratë e madje, dëmet thonë se i kanë shumë më të mëdha sesa iu është thënë.

“Ata kanë ardhur ta bëjnë verifikimin, e kanë cekur një shumë prej 15 mijë eurosh. Një shumë shumë shumë e vogël po as ato s’po i kryejnë si obligime. Kërkesa jonë mbetet të na bëjnë një zgjidhje, të na i renovojnë ose kompensojmë se kështu s’mund të jetojmë”, ka thënë Besnik Osa, pronar i shtëpisë së dëmtuar.

Televizioni ka kontaktuar edhe me kryetarin e Pejës, Gazmend Muhaxhirin i cili ka deklaruar se raportet mbi dëmet, komisioni i caktuar nga komuna ia ka drejtuar në MAPL.

“Është përgjegjësi e një komisioni në bazë të ligjit ndërministror e na, drejtoria për Emergjenca e bën hetimin e dëmeve dhe ia drejton komisionit ndërministror i cili më pas merr vendim për kompensimin e dëmeve. Agjensioni e ka marr vendimin por vendim nuk ka marrë ende Qeveria sepse ka marrë datën gabim. Prej atij viti, nuk janë kompensuar familjet që janë dëmtuar”, ka deklaruar ai.

E nga kjo e fundit, përgjegjësinë ia hedhin Qeverisë.

“Komisioni Qendror për Vlerësimin e Dëmeve nga Fatkeqësitë Natyrore dhe Fatkeqësitë tjera i themeluar me Vendimin Nr. 14/99 të datës 30.09.2022 e Qeverisë së Republikës së Kosovës bazuar në Ligjin Nr. 04/-L-027 për Mbrojtje nga Fatkeqësitë Natyrore dhe Fatkeqësitë Tjera, Rregulloren (QRK) Nr. 17/2015 për Metodologjinë e Vlerësimit të Dëmeve nga Fatkeqësitë Natyrore dhe Fatkeqësitë Tjera, ka shqyrtuar raportet për dëmet e shkaktuara nga fatkeqësitë natyrore dhe fatkeqësitë tjera të Komunës së Pejës dhe i ka proceduar për miratim përfundimtar në Qeveri e cila në bazë të mundësive buxhetore vendos për kompensim”, thuhet nga ana e Arianit Abazit, zëdhënësi i Ministrisë dhe Pushtetit dhe Administrimit Lokal.

Përpos Pejës, vërshimet kishin shkaktuar dëme të mëdha në Skënderaj, Mitrovicë, Klinë, Istog dhe Podujevë./Dukagjini

Thyhet REKORDI I ZBRITJEVE!

Sponsoruar