Disa nga banorët në rrugën”Rexhep Luci” në Prishtinë, të premten kanë protestuar në shenjë pakënaqësie ndaj vendimit të Komunës së Prishtinës për mbylljen e një pjesë të kësaj rruge për qarkullim të mjeteve motorike.

Banori i kësaj lagje, Granit Zeka tha për “Betimi për Drejtësi” se nuk mund të rregullohet një problem duke krijuar një problem tjetër.

“Nuk mundesh me e rregullu një problem tu e shtu një problem tjetër. Nëse ti i hjek qeto parkingje që janë këtu rend edhe i çon ato në tunel, menjëherë po dyfishohet numri i kerreve dhe as vetë ne banorët nuk kemi me pas vend ku me i lanë kerret”, tha Zeka.

Përfaqësuesi i banorëve të kësaj zone, Mentor Doburuna tha për “Betimi për Drejtësi” se ata kanë pasur kërkesa për lirimin e hapësirave të uzurpuar por jo të merret vendim për largimin e veturave për shkak se ata kanë nevoja, duke i përmendur edhe ato në raste të emergjencave.

“Natyrisht që kërkesat tona kanë qenë që të lirohen hapësirat e uzurpuara dhe jo veturat për shkak se ne kemi nevoja e kërkesa familjare dhe duhet me pas qasje për shkak se kemi fëmijë, pleq, plaka, invalidë. Kemi nevoja për emergjenca, kemi nevoja për furnizime e këto”, tha Doburna.

Ndërsa, drejtori për Shërbime Publike në Komunën e Prishtinës, Ilirik Musliu tha për “Betimi për Drejtësi” se mbyllja e rrugës “Rexhep Luci” për mjete motorike është vendim i kryetarit të Komunës gjë për të cilën ata si Drejtori duhet ta respektojnë.

“Me këtë vendim të kryetarit Rama, jemi të obliguar me e respektu dhe realisht me e implementu vendimin e tij”, tha Musliu.

Tutje, Musliu tha se për marrjen e këtij vendimi beson se janë bërë analizat e nevojshme.

“Besoj që kanë bërë analizë, kanë bërë të gjitha matjet e nevojshme të cilat duhet me u bë para se me u bë projekti dhe implementimi”, tha ai.

Përveç rrugës “Rexhep Luci”, Komuna e Prishtinës ka marrë vendim edhe për mbylljen e një pjese të rrugës “Qamil Hoxha”, për të gjitha mjetet motorike.

Sipas njoftimit të Komunës së Prishtinës, ky vendim hyn në fuqi nga sot.

Për këtë, Instituti i Kosovës për Drejtësi (IKD) më 26 gusht ka reaguar, duke vlerësuar se është i paligjshëm vendimi i kryetarit Rama për mbylljen e disa rrugëve në qendër të kryeqytetit, përfshirë rrugën e vetme për t’iu qasur me automjete dy mediave kombëtare.

IKD-ja i ka rekomanduar Komunës së Prishtinës që ta anulojë vendimin e datës 18 gusht dhe para nxjerrjes së vendimit të ri lidhur me këto rrugë, të zhvillojë konsultime publike cilësore si dhe të nxjerrë vendim të arsyetuar, ashtu siç kërkohet me ligj

UNICEF-i global boton artikull për rezultatet e partneritetit me Devolli Corporation: U fuqizuan gratë, përfituan familjet

Sponsoruar