Lajme

Sarrazin tregon çka i tha Kurtit për veriun: Secili përgjegjës për veprimet e veta

Autori: Gazeta inFokus 12:11 | 05 June 2023

I dërguari i Gjermanisë për Ballkanin Perëndimor, Manuel Sarrazin, ka treguar se çfarë i ka thënë kryeministrit Albin Kurti gjatë takimit që u zhvillua javën e kaluar.

Në një intervistë të realizuar për Table Berlin, ai tregon se i ka thënë Kurtit se secili është përgjegjës për veprimat e veta.

“Fillimisht, më duhet të them atë që i thashë drejtpërdrejt kryeministrit Kurti: secili është përgjegjës për veprimet e veta. Natyrisht, presidenti serb Aleksander Vuçiq ka mbjellë mosbesim shtesë me deklaratat dhe votën në Këshillin e Evropës javët e fundit. Megjithatë, vendimi i qeverisë së Kosovës për të rrezikuar këtë përshkallëzim duke i çuar kryetarët e komunave në bashki me një përcjellje të fuqishme policore është një gabim për të cilin ajo mban përgjegjësi politike”.

-Advertisement-

Tutje, ai ka thënë se dialogu i udhëhequr nga BE-ja duhet të vazhdojë me intensitet të plotë, shkruan Klankosova.tv.

“Ne e mbështesim plotësisht të dërguarin special të BE-së, Miroslav Lajçak. Për t’u larguar nga situata e vazhdueshme e krizës tani, zbatimi i marrëveshjes bazë midis dy vendeve, të rënë dakord në shkurt dhe mars, duhet të përparojë përfundimisht. Kancelari Scholz dhe presidenti Macron i mbështetën prerazi këto përpjekje për dialog në bisedimet e përbashkëta me krerët e shteteve nga Kosova dhe Serbia të mërkurën në Moldavi. Prioriteti këtu është kthimi në tryezën e bisedimeve, qetësimi i situatës në veri, vazhdimi i zgjedhjeve të reja në komunitete dhe zbatimi i marrëveshjes bazë”.

I pyetur rreth përgjegjësisë së palës serbe, ai ka thënë se mbajnë përgjegjësi për sulmet ndaj KFOR-it dhe policisë.

“Nuk mund ta thuash këtë në përgjithësi. Ka nga ata që e kanë marrë mendjen, që janë përzier dhunshëm me demonstruesit para bashkisë. Ata, natyrisht, mbajnë përgjegjësi për sulmet ndaj KFOR-it dhe policisë, veçanërisht ndaj atyre që kryen krime të dhunshme. Nuk duhet të gënjejmë se këta ishin vetëm qytetarë të Mitrovicës së Veriut. Ata nuk ishin”.

Subscribe në YouTube: GAZETA INFOKUSI