Instituti i Kosovës për Drejtësi (IKD), në tryezën e diskutimit të organizuar të premten me titull “Kuvendi i privilegjeve”, ka publikuar edhe raportin me titull: “DOBËT: Raport i monitorimit të punës së Kuvendit të Kosovës për vitin 2022”, si rezultat i monitorimit sistematik që IKD i ka bërë punës së Kuvendit të Kosovës gjatë vitit 2022.

Kryetari i Kuvendit të Kosovës, Glauk Konjufca, në këtë tryezë, ka thënë se problem i funksionimit të Kuvendit të Kosovës është sjellja e deputetëve, përkatësisht sjellja e të zgjedhurve të popullit.

Sipas tij, Kushtetuta, Ligji për Detyra dhe Përgjegjësi të deputetit dhe Rregullorja e Kuvendit të Republikës së Kosovës janë 3 dokumentet më të rëndësishme të deputetit, të cilat e definojnë deputetin fuqishëm si një subjekt të pavarur, i cili duhet t’i nënshtrohet vetëm ndërgjegjes së tij.

“Dhe unë mendoj që kjo prej shumicës së të zgjedhurve të popullit është keqkuptu, kjo mendohet në një interpretim absolutist t’i nënshtrohet vetëm ndërgjegjes së tij. Sikur nënkuptohet që me ju nënshtru ndërgjegjes askujt tjetër sikur e nënkupton se nuk i përfill as rregullat, as obligimet sepse i nënshtrohet vetëm ndërgjegjes të tij, jo edhe rregullave, jo edhe obligimeve, jo edhe detyrimeve që vijnë prej këtyre dokumenteve”, tha Konjufca.

Sipas tij, në Ligjin për Përgjegjësitë e Deputetit thuhet se “Pjesëmarrja në seancë është detyrim dhe nuk është zgjedhje”.

“Nëse ai i nënshtrohet vetëm ndërgjegjes dhe nëse ndërgjegja e tij thotë se nuk du me ardhë në seancë, kjo është në kundërshtim me ligjin, është antiligjore. Nëse ne funksionojmë sipas ligjit si deputetë, dhe nëse në ligj shkruan se ardhja në seancë është detyrim, atëherë a mundet me më tregu dikush çka i bjen kjo?  Kjo qysh e kuptoj si kryetar është obligim i fortë, i fuqishëm, në të kundërtën duhet me informu kryetarin pse nuk ke ardhë në seancë”, tha tutje Konjufca.

Po ashtu, Konjufca ka thënë se ka disa paqartësi dhe keqinformime edhe sa i përket kompensimit të kategorive të ndryshme.

I njëjti tha se para 5 viteve ka  ndryshuar modusi i kompensimit në seanca.

“Nuk është më që seancë që ti e qet nënshkrimin merr meditje. Ta keni parasysh se nënshkrimi nuk është i lidhur më kompensimin në seancë. Nuk është i lidhur në mënyrë të drejtpërdrejtë nënshkrimi me mëditje, sepse është brenda cikli 4 herë pjesëmarrja në seancë dhe me 4 herë pjesëmarrje në seancë e kap normën e plotë. P,sh kur një deputet ka ardhë dhe e ka qit për herë të 7 nënshkrimin në seancë ai nuk kompensohet, ai e qet nënshkrimin në rregull është sepse neve na duhet pjesëmarrje dhe neve na duhet me ditë sa është numri, por kjo nuk shkon automatikisht meditje edhe nënshkrimi i tij i 7”, tha Konjufca.

Ai tha se nuk ka relacion automatikisht kuantitativ mes nënshkrimeve dhe numrit të nënshkrimeve në seanca dhe kjo është një rregull e re që është ndryshuar para 3-4 viteve sepse është konstatuar se ka pasur keqpërdorime.

Ndryshe, Instituti i Kosovës për Drejtësi (IKD), me përkrahje të Rockefeller Brothers Fund (RBF), organizoi tryezën e diskutimit: “Kuvendi i privilegjeve”, ku u publikua edhe raporti me titull: “DOBËT: Raport i monitorimit të punës së Kuvendit të Kosovës për vitin 2022”, si rezultat i monitorimit sistematik që IKD i ka bërë punës së Kuvendit të Kosovës gjatë vitit 2022.

Hapet shkolla e mesme profesionale në Qytetin e Ferizajit

Sponsoruar