Politikani pro serb Jakov Milantoviç, është zgjedhur president i Malit të Zi në raundin e dytë të votimeve ku mundi Milo Gjukanoviçin me rezultat të thellë. Kreu i ri i shtetit premtoi se brenda 5 viteve, Mali i Zi do të jetë vend anëtar i Bashkimit Europian. Pas shpalljes së rezultatit, para selisë së partisë “Evropa Tani”, mbështetësit festuan ndërkohë që nuk munguan as thirrjet nacionaliste: Kosova është Serbi!

E diela e 2 prillit shënoi fundin e epokës politike të Milo Gjukanoviçit në Mal të Zi, pasi Jakov Milantoviç u zgjodh president i vendit në raundin e dytë të votimit.

Fituesi ka marrë 60,2% të votave në raundin e dytë të zgjedhjeve presidenciale në Malin e Zi, ndërsa ish-presidenti Millo Gjukanoviç u mbështet nga 39,8% e votuesve duke u larguar nga pushteti pas plot 30 vitesh.

-Advertisement-

Kreu i ri i shtetit tha se Mali i Zi bëri dhe i tha lamtumirë regjimit të Gjukanoviçit dhe bëri një hap drejt të ardhmes më të mirë europiane.

“Në pesë vitet e ardhshme ne do ta anëtarësojmë Malin e Zi në Bashkimin Evropian. Gjithashtu, nuk do të ketë më kurrë konflikte nga Mali i Zi ndaj asnjë vendi të Ballkanit Perëndimor dhe fqinjëve tanë. Ne duam unitet, harmoni dhe përparim në Ballkanin Perëndimor evropian”.

E teksa Milantoviç bënë këto deklarata mbështetësit e tij kanë provokuar gjatë festës para selisë “Europa tani” me thirrje Kosova është Serbi! Siç raportojnë mediat serbe, përkrahësit e Milatoviç, një politikan pro serb, mbanin edhe flamuj të Serbisë ndërsa këndonin “Gëzohu popull serb”, “Kosova është Serbi” dhe “Mali i Zi dhe Serbia, kjo është një familje”

Milo Gjukanoviç, 61 vjeç, i cili ka shërbyer herë si kryeministër e herë si president i Malit të Zi për 33 vjet, pranoi humbjen duke e uruar fituesin.

“Mali i Zi bëri një zgjedhje dhe unë e respektoj atë. Le të jetë një president i suksesshëm. Nëse është kështu, edhe Mali i Zi do të jetë një vend i suksesshëm”, tha Gjukanoviç.

Kryeministri i Malit të Zi në mandatin teknik, Dritan Abazoviç, përgëzoi Milatoviçin për “zgjedhjen e tij si presidenti i parë evropian në historinë e Malit të Zi! Ne do të punojmë së bashku për një shtet evropian, civil dhe ekologjik”, shkroi ai në rrjetet sociale.

Në raundin e dytë të zgjedhjeve presidenciale kanë votuar rreth 383 mijë votues me një pjesëmarrje në nivelin e 70,7%.

Jakov Millatoviç është kandidati i Lëvizjes Evropa Tani, forcë politike e themeluar në qershor të vitit të kaluar. 37-vjeçari i zgjedhur president, ka hyrë në politikë më pak se tri vite më parë.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-