Më 13 tetor çështja e liberalizimit të vizave për Kosovën do të jetë në rend të ditës në takimin e grupit punues të Këshillit Evropian në Bruksel.

Kjo u konfirmua edhe zyrtarisht nga presidenca çeke e Bashkimit Evropian, shkruan Gazeta Infokus.

Ministri i Jashtëm i Çekisë, Jan Lipavsky, gjatë një vizite në Kosovë tha se ai pret që gjatë mandatit gjashtëmujor të Presidencës çeke të Bashkimit Evropian, do të finalizohet procesi i liberalizimit të vizave për qytetarët e Kosovës.

“Liberalizimi i vizave është një proces që përbëhet nga çështjet teknike. Bashkimi Evropian do të rishikojë shumë shpejt aspektet teknike dhe unë shpresoj shumë që Presidenca çeke do të arrijë deri te një marrëveshje, dhe Kosova do të ketë liberalizim të vizave. Është shumë e vështirë të parashikojmë datën. Pritjet e mia për vendimin janë shumë të larta, dhe kjo është pjesë e agjendës sime politike”, tha shefi i diplomacisë Jan Lipavsky gjatë vizitës së tij në Kosovë.

Por si do të ndikojë takimi i 13 tetorit në procesin e liberalizimit të vizave për Kosovë?

Njohësi i çështjeve të integrimeve evropiane, Agron Hoti, në një prononcim për Gazetën Infokus u shpreh skeptik se kjo datë do të sjellë liberalizimin e vizave.

“Meqë çështja e vizave për Kosovën është ende në nivel të Grupe Punuese, atëherë është joreale që vizat mund të hiqen këtë vit, aq më tepër kur vetë ambasadori aktual gjerman ka thënë se “vizat do të mund të hiqen në fillim të vitit tjetër”. Ndërkohë që, për mendimin tim, pa pasur progres në dialogun Kosovë-Serbi, çështja e vizave mund të stërgjatët sërish ashtu sikurse që ka ndodhur deri me sot”, ka thënë Hoti.

Madje ai thotë se Bashkimi Evropian po e përdor dialogun me Serbinë për ta joshur Kosovën që të vazhdojë takimet në mënyrë që qytetarëve të Kosovës tu liberalizohen vizat.

Gjithashtu, sipas Hotit BE-ja po e intensifikon çështjen e vizave për Kosovën vetëm në formë deklarative.

“Intensifikimi i narracionit për heqje të vizave përbën përgjigjen e vonuar të BE-së karshi këtij procesi. Në këtë kuadër duhet kuptuar lëvizjen e BE-së edhe pse ende vetëm në formë deklarative. Këtë intensifikim më shumë e shoh si karrotë kundrejt dialogut me Serbi duke na joshur që ta vazhdojmë atë. Nëse BE do ta shohë që Kosova po tregohet gjeneroze në dialog, atëherë heqjen e vizave do ta përdorë si shpërblim, ndërsa nëse kjo mungon, atëherë shoh stërgjatje të procesit, sepse mos-heqja e vizave përdoret vetëm si mjet presioni ndaj Kosovës”, ka thënë njohësi i çështjeve për integrime evropiane.

Gjithashtu, pasi që Çekia është në krye të BE-së, Hoti thotë se kjo e fundit duke e ndjerë kërcënimin e Rusisë ndaj Evropës ka shtuar përpjekjet për integrimin e Ballkanit Perëndimor në BE.

“Çekia është një vend anëtar i BE-së që e ka njohur pavarësinë e Kosovës dhe më shumë se çdokush në BE (bashkë me Poloninë) e ndien kërcënimin rus ndaj Evropës, ndaj ka shtuar përpjekjet për shtyrje përpara të rend-ditës evropiane karshi integrimit të Ballkanit Perëndimor në BE. Megjithatë, e vërteta është se janë shtetet e fuqishme të BE-së, kryesisht Gjermania, Franca e Polonia, ato që për t’i dhënë shtysë dialogut Kosovë-Serbi janë duke e intensifikuar çështjen e vizave për Kosovën vetëm në formë deklarative”, ka thënë Hoti për Infokus.

Ndryshe, procesi i liberalizimit të vizave ndërmjet Kosovës dhe Bashkimit Evropian ka filluar në vitin 2012, ndonëse ende nuk është finalizuar.

Kosova është i vetmi vend në Evropë që ende nuk gëzon të drejtën e lëvizjes së lirë, ndonëse qysh prej pesë vjetësh Komisioni Evropian ka konfirmuar që Kosova i ka plotësuar të gjitha kriteret për liberalizim/Gazeta Infokus/

Marsi sjell Magji në ETC

Sponsoruar