Kryeministri i Shqipërisë, Edi Rama, marrëveshjet e sotme që pritet të nënshkruhen në kuadër të “Ballkanit të Hapur” i ka quajtur fillim i një epoke të re në rajon.

Në samitin e sotëm në Tiranë, kreu i qeverisë shqiptare tha se “Ballkani i Hapur” është nismë gjithëpërfshirëse që synim ka lirinë e plotë të lëvizjes së njerëzve, mallrave, kapitaleve dhe shërbimeve.

Ai para presidentit serb, Aleksandër Vuçiq dhe kryeministrit të Maqedonisë së Veriut, Zoran Zaev, i bëri thirrje sërish shteteve refuzuese të “Ballkanit të Hapur” t’i bashkohen kësaj nisme.

“Jam shumë i kënaqur t’iu them se sot është një moment kyç i procesit tonë sepse marrëveshjet që do të nënshkruhen do të përcaktojnë një hap shumë të rëndësishëm, drejt objektivit tonë që është të garantojmë lirinë e plotë të njerëzve, mallrave, kapitaleve dhe shërbimeve. ‘Ballkani i hapur’ është një nismë tërësisht përfshirëse dhe sigurisht duke inkurajuar të tjerët në rajon që të jenë pjesë e kësaj përpjeke dhe ndërkohë ne po ecim përpara sepse kjo është ajo çka duhet të bëjmë për më të mirën e njerëzve tanë. Në lirinë e mallrave do të nënshkruajmë marrëveshjen tripalëshe për lehtësimin import-eksporteve të kafshëve të gjalla dhe njohjes së ndërsjellët të dokumentacionit të lëshuar nga organizmat tonë zyrtare të akreditimit si dhe zbatimin e memorandumit të mirëkuptimit të lehtësimit të importeve-eksporteve dhe të kalimit transit të mallrave midis ne të treve që tashmë është nënshkruar në korrikun e shkuar në Shkup”, tha Rama.

Ai tha se me marrëveshjet e sotme në kuadër të “Ballkanit të Hapur” viti 2022 do të jetë një epokë e re për bizneset e tri vendeve.

“Sot nënshkrimi i marrëveshjeve të përgatitura me mjaft zell dhe gatishmëri nga ekipet tona shërbejnë për të përçuar një mesazh mjaft konkret tek njerëzit, sidomos tek prodhuesit, tek fermerët, tek eksportuesit dhe importuesit të cilët tashmë janë duke punuar në një hapësirë të përbashkët. Mesazhi është se me këto marrëveshje 2022-ta do të jetë një epokë e re, fillesa e diçka krejtësisht të ndryshme për ta, kur vjen nga shkuarja e pikës ‘a’ deri në pikën ‘b’ dhe kalimin në kufi të ndryshëm”, shtoi ai.

Ndër marrëveshjet e tjera që pritet të nënshkruhen janë: kushtet për qasjen e lirë në tregun punës. skemat e përbashkëta për identifikimin elektronik të qytetarëve në pikat kufitare, për bashkëpunimin në fushën e sigurisë ushqimore, për njohjen e ndërsjellë dhe për operatorët ekonomikë.

Çka po ndodh me DITËLINDJEN e Viva Fresh Store?!

Sponsoruar