Kryenegociatori i Kosovës me Bashkimin Evropian, Jeton Zulfaj, ka paralajmëruar se Kosova mund të humbasë afër 90 milionë euro nga Plani i Rritjes nëse vendi shkon sërish në zgjedhje.Ai ka thënë se 131.4 milionë euro nga 22 hapat e Planit të Rritjes kanë afat përfundimtar deri më 31 dhjetor të këtij viti.Sipas tij, mungesa e një Kuvendi funksional dhe e një Qeverie me kapacitet të plotë mund të rrezikojë zbatimin e këtyre reformave dhe përfitimin e fondeve.

“Nëse shkojmë sërish në zgjedhje, do të humbasim sërish fonde nga Plani i Rritjes. 131,4 milionë euro nga 22 hapa të Planit të Rritjes kanë afat përfundimtar 31 dhjetorin e këtij viti. Pa Kuvend funksional dhe pa Qeveri me kapacitet të plotë, mund të humbim afër 90 milionë euro”- ka shkruar Zulfaj.Ai ka përmendur edhe projektligjet që, sipas tij, kishin ngecur në qershor për shkak të bllokadës në Kuvend dhe për të cilat pritet të humben mbi 40 milionë euro.Zulfaj ka thënë se këto projektligje janë miratuar sërish në Qeveri, janë dërguar në Kuvend dhe dje kanë kaluar në lexim të parë.“Nëse Presidenti nuk zgjedhet sot, edhe këto projektligje nuk shkojnë në lexim të dytë dhe duhet të procedohen nga fillimi, në Qeveri dhe në Kuvend”- ka deklaruar ai.

Në mesin e tyre, Zulfaj ka përmendur edhe ligjin për parandalimin e pastrimit të parave dhe financimit të terrorizmit, për të cilin thotë se do t’i mundësonte Kosovës të bëhej pjesë e SEPA-s.Sipas tij, ky ligj ishte miratuar nga Kuvendi në fund të vitit 2024, por ishte dërguar në Gjykatën Kushtetuese nga PDK-ja.“Çdo vit jashtë SEPA-s u kushton qytetarëve dhe bizneseve tona rreth 55 milionë euro”, ka shkruar Zulfaj.Zulfaj ka kritikuar opozitën për bllokadën institucionale.“Bllokada është zgjedhje.

-Advertisement-

Opozita ka zgjedhur të bllokojë, dhe koston po ua faturon qytetarëve”- ka shkruar ai.Kryeministri Albin Kurti para disa javësh ka thënë se Kosova duhet të fokusohet në zbatimin e 22 reformave që kanë afat deri në fund të dhjetorit, për të cilat janë të parapara 131.4 milionë euro nga fondet e Planit të Rritjes të Bashkimit Europian.Kurti këto deklarime i bëri në mbledhjen e dytë të Këshillit Ministror për Integrim Europian, në funksionin e Komitetit Drejtues për Planin e Rritjes.

“Tani vëmendja duhet të jetë te zbatimi i 22 reformave që skadojnë në fund të dhjetorit sivjet, në vlerë prej 131,4 milionë euro në fonde të BE-së. Mbi një e treta e këtyre reformave apo saktësisht 8 sosh kërkojnë miratim të projektligjeve në Kuvend”- tha Kurti.Kosova llogaritet se ka humbur mbi 40 milionë euro, ndërsa po pritet vetëm vendimi përfundimtar i Brukselit.Kosova ka tërhequr 62 milionë euro si parafinancim (7% e shumës), por pjesa tjetër kushtëzohet me hapat e agjendës.Gjashtë reformat që nuk zbatuan dhe llogariten se kushtojnë mbi 40 milionë euro: janë Ligjet për energjinë dhe energjinë elektrike së bashku me aktet nënligjore;

Ligji për ndihmën shtetërore dhe Sistemi i Kontrollit të Ndihmës Shtetërore; Ligji për inovacion dhe ndërmarrësi (Këshilli Kombëtar për Inovacion dhe Fondi i Inovacionit); Legjislacioni kornizë për falimentimin/paaftësinë paguese dhe Ligji për kamatëvonesat; Pakoja prej 6 ligjeve jetike (përfshirë ligjet për KPK-në, KGJK-në, Akademinë e Drejtësisë, përgjegjësinë disiplinore, rekrutimin dhe kontrollin e integritetit); dhe Strategjia për Luftimin e Krimit të Organizuar.Pakoja e BE-së për Ballkanin Perëndimor për periudhën 2024-2027 – është në vlerë 6 miliardë euro. Kosovës i takojnë rreth 882 milionë euro: 253 milionë si grante dhe 629 milionë euro në formë të kredisë.Më 13.02.2026, Kuvendi i Kosovës ka ratifikuar Marrëveshjen ndërkombëtare me Bashkimin Europian – Planin e Rritjes. Kjo është një ndër marrëveshjet me vlerën më të madhe dhe më të rëndësishmet që përfiton Kosova.

Për shkak të ngërçit të gjatë politik dhe mbajtjes së zgjedhjeve të reja, Plani i Rritjes kishte mbetur pa u ratifikuar për më shumë se një vit, duke mbajtur pezull shumën prej 882 milionë eurosh.

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-