Janë bërë 7 muaj që fermerët po presin kompensimin e dëmeve që iu shkaktuan nga fatkeqësitë natyrore, një herë nga erërat e forta e më pas edhe nga breshëri, shkruan Gazeta inFokus.

E pritjes së tyre duket se po i vie fundi.

Këtë e bëri të ditur edhe vet ministri i Bujqësisë, Pylltarisë dhe Zhvillimit Rural, Besian Mustafa, gjatë një fjalimi në seancën plenare në Kuvendin e Kosovës, ku u pyet se kur do të bëhen këto pagesa.

Ai tha se kompensimi do të filloj këtë javë, por, sipas një hulumtimi të Gazetës Infokus, del se ministri Mustafa ka favorizuar vetëm komunat e udhëhequra nga LDK-ja, nga radhët e të cilës vjen edhe vet ai.

Këtë e vërteton edhe fakti se në cilat komuna ky proces është në përfundim dhe në cilat jo, ku nga të gjitha komunat e prekura nga fatkeqësitë natyrore, del se në dy komuna ku udhëheq LDK-ja tashmë janë kërkuar edhe të dhënat bankare dhe fermerëve u është treguar edhe shuma të cilën ata do ta përfitojnë.

Diçka të tillë e kanë konfirmuar për Gazetën Infokus fermerë nga Podujeva, të cilët thanë se me datën 16 tetor kanë dërguar të dhënat bankare (konfirmimi bankar) në Komunë të cilat do të dërgohen në ministri.

“Komisioni nga Komuna e Podujevës kanë dalë ne teren dhe e kanë bërë vlerësimin e dëmeve. Dje na kanë kontaktuar ne fermerëve të dëmtuar dhe kanë kërkuar nga ne që t’i dërgojmë konfirmimet e llogarive bankare, në mënyrë që të ekzekutohet pagesa për dëmet e shkaktuara nga breshëri dhe shiu gjatë verës”, i kanë thënë Gazetës inFokus fermerët nga Podujeva.

Ata kanë treguar se do t’u kompensohet 25% e dëmeve të shkaktuara nga të reshurat.

Këtë e ka konfirmuar edhe Drejtori për Bujqësi në këtë komunë, Vezir Januzi.

Januzi ka thënë për Gazetën inFokus se janë në përfundim të mbledhjes së llogarive bankare të fermerëve.

“Pagesat e dëmeve janë ende në proces besoj se shumë shpejt do të paguhen edhe nga Ministria, në si komunë kemi filluar mbledhjen e llogarive bankare të fermerëve për ti dërguar në Ministri dhe besoj që shumë shpejt ka me përfunduar i gjithë procesi”, ka thënë ai.

Po ashtu të dhënat bankare të fermerëve në mënyrë që të ekzekutohet pagesa janë kërkuar edhe në Komunën e Istogut, e cila gjithashtu udhëhiqet nga LDK-ja.

Këtë për Gazetën inFokus e ka konfirmuar, Drejtori për Bujqësi i kësaj komune, Lulzim Shoshi, i cili ka thënë se komuna tashmë i ka dërguar të dhënat bankare të fermerëve në Ministrinë e Bujqësisë dhe presin ekzekutimin e pagesës.

“Ne i kemi pas sivjet dy dëme një në pranverë shumë herët dëmet e shkaktuara nga era dhe pritet që këto ditë Ministria të ekzekutoje pagesat për këta fermerë, pastaj dëmet e shkaktuar nga breshëri edhe ato i kemi proceduar, ne si komunë tashmë i kemi dërguar të dhënat bankare të fermerëve  në Ministri dhe po presim ekzekutimin e të hollave”, ka thënë Shoshi.

Mirëpo një gjë e tillë nuk ka ndodhur në komunat të cilat nuk udhëhiqen nga LDK-ja, shkruan Gazeta inFokus.

Në komunën e Rahovecit, Ministria e Bujqësisë po gjen arsye nga më të ndryshmet për të mos paguar për dëmet e fermerëve.

Kështu ka thënë për Gazetën inFokus, Drejtori për Bujqësi në këtë komunë, Berat Duraku.

Duraku madje i quan arsyetime banale ato çka i kanë thënë nga Ministria e Bujqësisë.

“Me datën 20 maj kemi dërgu në Minsitrinë e Bujqësisë raportin final me emrat e fermerëve të cilët kanë pësuar dëme, dhe deri më sot ende nuk janë dëmshpërbly fermerët për të cilët është marrë edhe një vendim në qeveri dhe ministri vetëm ka qenë prezent dhe i ka pa dëmet që janë shkaktuar. Ende nuk i kanë kërkuar as të dhënat bankare të fermerëve dhe ka arsyetime me thënë banale nga Ministria e Bujqësisë, si jo hala komunat tjera si kanë pru jo vendimi i qeverisë nuk e di qysh me arsyetuar këtë fare pune, por ne si komunë po atakohemi të parët si adresa e parë psh sot unë i kam pas nja 30 fermerë të cilët kanë ardhë me më taku personalisht për këto pagesa, duke më pyetur se kur po na i qitni paret”, ka deklaruar ai për inFokus.

E një rast të ngjashëm e kanë pasur edhe në komunën e Gjakovës e cila udhëhiqet nga AAK-ja, shkruan Gazeta inFokus.

Drejtori për Bujqësi në komunën e Gjakovës, Haxhi Sejdiu, ka thënë për Gazetën inFokus se shpreson të paguhen këto dëme por që ende nuk janë kërkuar as të dhënat bankare të fermerëve të dëmtuar.

“Dëmet nuk u janë paguar ende fermerëve, kërkesa me krejt dokumentacionet janë në Ministri të Bujqësisë, shpresoj që do të bëhet, Ministria ende nuk i ka kërkuar të dhënat bankare të fermerëve”, ka thënë ai.

Gazeta inFokus së pari ka kërkuar përgjigje nga Ministria e Bujqësisë se a janë paguar subvencionet e premtuara për fermerët e dëmtuar, dhe nëse jo kur do të paguhen.

Një përgjigje e shkurtë nga kjo ministri ka qenë se nuk janë paguar, mirëpo pas hulumtimit nga Gazeta inFokus duket se procesi deri te pagesa po ecën më shpejt në komunat në të cilat udhëheq LDK-ja, por jo edhe në ato që udhëhiqen nga parti të tjera.

“Sa i përket pagesave lidhur me kompensimin e dëmeve të shkaktuara nga fatkeqësitë natyrore për periudhën janar – qershor 2020 jemi në pritje të plotësim/ndryshimit të Vendimit të Qeverisë, pas mbledhjes së të dhënave të fermerëve të dëmtuar nga komunat. Këto mjete do të kompensohen nga buxheti i MBPZhR-së në llogaritë e fermerëve të dëmtuar”, thuhet në përgjigjen e ministrisë për inFokus.

Edhe komuna e Obiliqit është në pritje të këtyre pagesave, ani pse me një buxhet nga komuna tashmë i kanë dalë në ndihmë fermerëve të dëmtuar.

“DBZHR-ja i ka dërguar listën e fermerëve të dëmtuar, por që ende nuk janë të paguara nga ana e ministrisë”, thuhet në përgjigjen e komunës për Gazetën inFokus.

Kujtojmë se pas dëmeve që u shkaktuan nga fatkeqësitë natyrore, ishte vetë Ministri i Bujqësisë, Besian Mustafa i cili u premtoi dëmshpërblim fermerëve të dëmtuar në të gjitha komunat./Gazeta inFokus/

BKT Kosova vlerësohet për herë të katërt "Banka e Vitit 2024 në Kosovë" nga The Banker

Sponsoruar