Kërkesa për interpelancë për rritjen e pagës minimale në Kosovë nga Partia Socialdemokrate po del të jetë në kundërshtim me ligjin.

Sipas ligjit, vetëm Këshilli Ekonomiko-Social ka të drejtë të kërkojë rritje të pagës minimale, shkruan Gazeta inFokus.

Pjesë e këtij këshilli janë sindikatat, organizatat e punëdhënësve dhe Qeveria e Kosovës.

-Advertisement-

Pika dy e nenit pesë të ligjit për Këshillin Ekonomiko-Socal saktëson se ky organ është apolitik dhe funksionon si i pavarur, pa ndikim të ndonjë grupacioni apo interesi politik që vjen nga jashtë.

LIGJI

“1. Këshilli ekonomiko-social (në tekstin e mëtutjeshëm “KES”), është organ i nivelit nacional, i cili udhëheq konsultimet dhe bënë propozime organeve kompetente për çështjet nga marrëdhënia e punës, mirëqenia sociale dhe çështjet e tjera që kanë të bëjnë me politikat ekonomike në Republikën e Kosovës.

2. KES-i si organ më i lartë trepalësh është apolitik dhe funksionon si i pavarur, pa ndikim të ndonjë grupacioni apo interesi politik që vjen nga jashtë”, thuhet në ligj.

Kërkesën për interpelancë, ndërhyrje drastike në punën e këtij këshilli, e ka konsideruar kryetari i Odës Ekonomike të Kosovës, Berat Rukiqi.

“Po, kjo është një ndërhyrje drastike. Kjo tregon se krejt partitë në parlament janë në vazhdën e një popullizmi dhe pagën minimale mund ta caktojnë vetëm partnerët social askush tjetër. As nuk mund të caktohet me vendim të qeverisë e as me vendim të parlamentit”, ka thënë Rukiqi.

Sipas tij, rritja e pagës minimale nuk mund t’u imponohet palëve të cilat janë të përfshira në këtë këshill.

“Është mes partnerëve social dhe nuk mund të caktohet ndryshe. Nuk mund t’ia imponosh vullnetin e palëve, edhe parlamenti nuk mundet me e imponu vullnetin e partnerëve social, është diçka e ndarë. Është proces i cili nuk përcaktohet me vendime politike”, ka theksuar kryetari i Odës Ekonomike të Kosovës.

Në kërkesën e PSD-së për interpelancë, thuhet se paga minimale nuk duhet të jetë më e vogël se koeficienti 1 i ligjit të pagave në sektorin publik.

Megjithatë, Rukiqi thotë se edhe kjo gjë është gabim.

Sipas tij, askund në botë paga minimale nuk lidhet me pagat tjera në vend.

“Varet se në çfarë niveli shkon rritja e pagës minimale. Në asnjë vend të botës paga minimale nuk lidhet me pagën më të ulët se që e kanë përcaktu me atë rezolutë. Paga minimale është një minimu që lidhet me gjendjen e përgjithshme ekonomike dhe nuk lidhet me pagat e tjera në vend”, ka deklaruar ai.

Ligji i ri për pagat në sektorin publik, ka sjellur reagime të shumta.

Sipas ekspertëve, ky ligj ka thelluar diferencën mes pagave në sektorin publik dhe atë privat. /Gazeta inFokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-