Zyra e Rregullatorit për Energji (ZRRE) ka mbetur pa Bord funksional që nga 3 gushti 2026, duke pamundësuar të marrë vendime për çështje që kërkojnë miratimin e këtij organi.

Situata bëhet edhe më serioze për faktin se licencat për prodhimin e energjisë elektrike të termocentraleve “Kosova A” dhe “Kosova B” skadojnë më 4 tetor 2026, ndërsa aktualisht Bordi i ZRRE-së nuk ka kuorumin e nevojshëm për vendimmarrje.

Këtë e ka konfirmuar vetë ZRRE-ja në një përgjigje ekskluzive për Gazetën Infokus.

-Advertisement-

Sipas Rregullatorit, tre anëtarëve të Bordit u kanë përfunduar mandatet, duke e lënë këtë institucion pa kuorumin e nevojshëm ligjor që nga fillimi i muajit gusht.

“Bordi i ZRRE-së nuk ka kuorumin e nevojshëm ligjor për të marrë vendime që nga data 3 gusht 2026, pas përfundimit të mandateve të tre anëtarëve përkatës. Për rrjedhojë, Bordi aktualisht nuk mund të ushtrojë kompetencat vendimmarrëse të përcaktuara me ligj”, thuhet në përgjigjen e ZRRE-së për Infokus.

Kjo nënkupton se çështjet për të cilat ligji kërkon vendim të Bordit nuk mund të përmbyllen derisa të rikthehet kuorumi.

ZRRE-ja sqaron se kërkesat për autorizimin e ndërtimit të kapaciteteve të reja energjetike mund të pranohen dhe të plotësohen, por procedurat që kërkojnë vendimmarrjen e Bordit mbeten të bllokuara.

Por problemi bëhet veçanërisht i ndjeshëm te prodhimi i energjisë elektrike nga KEK-u.

Vetëm pak ditë kanë mbetur deri në skadimin e licencave të dy termocentraleve kryesore të Korporatës Energjetike të Kosovës.

ZRRE-ja ka konfirmuar për Gazetën Infokus se licencat e “Kosovës A” dhe “Kosovës B” janë të vlefshme vetëm deri më 4 tetor 2026.

“Kapacitetet prodhuese të Korporatës Energjetike të Kosovës (KEK) janë subjekt i licencimit nga ZRRE-ja, në përputhje me legjislacionin në fuqi. TC Kosova A dhe TC Kosova B kanë licenca të ndara për prodhimin e energjisë elektrike nga ZRRE-ja. TC Kosova A është i licencuar me Licencën nr. ZRRE/Li_115/26, ndërsa TC Kosova B me Licencën nr. ZRRE/Li_116/26. Të dyja licencat janë të vlefshme deri më 4 tetor 2026”, kanë konfirmuar nga ZRRE-ja.

Kështu, nëse deri në atë datë nuk rivendoset kuorumi dhe nëse vazhdimi apo lëshimi i licencave kërkon vendim të Bordit, krijohet rreziku që KEK-u të përballet me skadimin e licencave të prodhimit për të dy termocentralet pa një vendim të ri të ZRRE-së.

Vetë Rregullatori pranon se mungesa e kuorumit ndikon në trajtimin e çështjeve që kërkojnë vendim të Bordit.

Sipas ZRRE-së, palët njoftohen për rrethanat që ndikojnë në zhvillimin e procedurave përkatëse.

Situata e krijuar vjen në një moment kritik për sektorin energjetik./Gazeta Infokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-