Drejtori menaxhues i Fondit Kosovar për Garanci Kreditore, Besnik Berisha, ka treguar në detaje përfitimet e bizneseve nga Masa 2.2 që ka të bëjë me mbështetjen e tyre për qasje në financa, në kuadër të Ringjalljes Ekonomike.

Ai ka thënë se ky fond ka pasur rolin kyç në implementimin e këtyre masave.

“Fondi ka pasur rol kyç në implementimin e masave, një prej masave të pakos të rimëkëmbjes ekonomike, e cila ajo masë ka qenë çasja në financa për ndërmarrjet mikro të vogla dhe të mesme, në fondament realisht ky është edhe misioni i përgjithshëm i institucionit tonë që ka tërhequr vëmendjen dhe ka luajtur një rol të theksuar posaçërisht gjatë përballjes me krizën nga pandemia Covid-19, dhe si rezultat ka implementuar masën e cila adreson çasjen në financa për ndërmarrësit private në Kosovë, kur flitet për ndërmarrje mikro të vogla dhe të mesme në Kosovë, flasim për ndërmarrësin private se 99.9% gati e ndërmarrjeve private në Kosovë janë mikro të vogla dhe të mesme”, ka thënë Berisha.

Në vazhdën e aktiviteteve të cilat mëtojnë të ngrisin vetëdijen rreth pakos së Ringjalljes Ekonomike, të aprovuar në korrik të vitit 2021, Instituti për Politika Zhvillimore (INDEP) ka organizuar diskutimin e radhës me temën “Zbatimi i pakos së Ringjalljes Ekonomike – Masa 2.2, Mbështetja e Bizneseve për Qasje në Financa”, e ku mysafir ka qenë Drejtori menaxhues i Fondit Kosovar për Garanci Kreditore, Besnik Berisha.

Berisha ka treguar se pse kjo masë ka qenë e rëndësishme për bizneset.

“Kjo masë ka qenë e rëndësishme sepse gjatë krizave zakonisht ndodh që mund të kemi ngërç kreditor, dhe kur ka një ngërç kreditor apo ngadalësim të aktivitetit kreditor ka më pak mjete në qarkullim dhe sa herë ka stangnim ekonomik, atëherë mungesa e kreditimit në ekonomi, konsiderohet një prej ingjeksionit kryesore në nisjen e asaj rrotës ekonomike brenda një krizës financiare apo ekonomike, atëherë mund ta përkeqësoj edhe më shumë krizën financiare apo ekonomike”, ka shtuar ai.

Sa i përket bashkëpunimit me ekzekutivin e vendit, Drejtori menaxhues i Fondit Kosovar për Garanci Kreditore, Besnik Berisha, ka treguar se edhe pse ju ka rënë që të punojnë me tri administrata apo me tri qeveri, me të gjitha kanë pasur një bashkëpunim të mirë.

“Neve na ka rënë të punojmë me tri administrata apo me tri qeveri prej kur ka filluar pandemia, me të triat komunikimi, kooperimi, bashkëpunimi ka qenë në nivelin më të lartë edhe qeveria ka ndihmuar fondin dhe ka lejuar qe fondi të jetë komplet i pavarur ashtu siç parashihet edhe me ligj të punojë në baza profesionale edhe ta ndihmoje me kapital. Kanë qenë të dy këto gjërat kryesore që faktikisht ne si struktura qeverisëse të Fondit Kosovar për Garanci Kreditore e vlerëson më së shumti”, është shprehur Berisha.

Ky aktivitet zbatohet me mbështetjen e ‘Balkan Trust for Democracy’, një projekt i ‘German Marshall Fund of the United States’ dhe USAID. /Gazeta Infokus/