Lajme

Arabia Saudite ekzekuton tre ushtarë për “tradhti të lartë”

Autori: Gazeta inFokus 12:58 | 10 April 2021

Arabia Saudite të shtunën ekzekutoi tre ushtarë të shpallur fajtorë për “tradhti të lartë” dhe “bashkëpunim me armikun”, njoftoi Ministria e Mbrojtjes.

Në deklaratën e kësaj ministrie thuhet se tre ushtarët janë dënuar me vdekje nga një gjykatë speciale pas një gjykimi të drejtë, shkruan Reuters.

Ministria nuk e përmendi emrin e armikut të pretenduar me të cilin kanë bashkëpunuar ushtarët, por ekzekutimi i tyre u bë në një provincë jugore që kufizohet me Jemenin, ku Arabia Saudite është në luftë për më shumë se gjashtë vjet kundër rebelëve Houthi, të cilët janë të lidhur me Iranin.

-Advertisement-

Arabia Saudite ka marrë vëmendje të madhe botërore për shkak të gjendjes rreth të drejtave të njeriut që nga vrasja e gazetarit Jamal Khashoggi në tetor të vitit 2018 në konsullatën e këtij shteti në Stamboll dhe ndalimit të aktivistëve për të drejtat e grave.

Grupet për të drejtat e njeriut, përfshirë të famshmin “Amnesty International”, i kanë bërë thirrje Riadit që ta ndërpresë përdorimin e dënimit me vdekje, duke i cituar pretendimet për torturime dhe gjykime të padrejta. Sidoqoftë, Arabia Saudite i ka mohuar këto akuza.

Vitin e kaluar, Arabia Saudite ekzekutoi vetëm 20 persona, që është shifër shumë e ulët në krahasim me rekordin prej 185 të ekzekutuarve në vitin 2019, sipas të dhënave të Komisionit për të Drejtat e Njeriut.

Subscribe në YouTube: GAZETA INFOKUSI