Gjykata e Apelit e ka liruar përfundimisht nga akuzat për vrasje të rëndë në tentativë dhe armëmbajtje pa leje, Mikel Qupin.

Qupi akuzohej nga Prokuroria Speciale e Republikës së Kosovës (PSRK), për vrasje të rendë të mbetur në tentativë të ish-kryetares së Komunës së Gjakovës, Mimoza Kusari-Lila dhe të Prek Radit.

Aktgjykim lirues ndaj Qupit kishte nxjerr edhe Gjykata Themelore në Gjakovë në dhjetor të vitit të kaluar, pasi që kishte vlerësuar se nuk ka prova të mjaftueshme.

Mirëpo, me vendimin e Themelores nuk ishte ndarë e kënaqur PSRK-ja, e cila kishte ushtruar ankesë në Apel duke kërkuar që çështja të kthehet në rigjykim.

Sipas pretendimeve ankimore të PSRK-së, thuhej se gjykata e shkallës së parë ka bërë shkelje esenciale të dispozitave të procedurës penale pasi dispozitivi i aktgjykimit, sipas prokurorisë, është i paqartë dhe në kundërthënie me vetveten dhe arsyetimin e aktgjykimit.

Po ashtu, PSRK-ja pretendonte se aktgjykimi i Themelores nuk është bazuar në faktet dhe provat e proceduara në shqyrtimin gjyqësor ashtu që nuk është vlerësuar çdo provë një nga një e në bazë të vlerësimit të provave të nxjerr përfundime të qarta dhe konkrete lidhur me faktet vendimtare por vetëm është konstatuar cilave prova gjykata ua ka falur besimin e cilave jo pa një arsyetim të bindshëm

Këto pretendimet të PSRK-së, gjykata e shkallës së dytë i ka refuzuar si të pabazuara.

“Gjykata e Apelit me vëmendje ka shqyrtuar aktgjykimin e shkallës së parë, ankesën e Prokurorisë si dhe shkresat e lëndës dhe vlerëson se aktgjykimi i atakuar me ankesë nuk përmban shkelje esenciale të dispozitave të procedurës penale. I njëjti  ka të paraqitura arsyet për çdo pikë të aktgjykimit, është paraqitur qartë dhe në mënyrë të plotë se cilat fakte dhe për çfarë arsyesh i konsideron të vërtetuara apo të pa vërtetuara”, thuhet në aktgjykimin e Apelit.

Tutje, sipas vlerësimit të Apelit, gjykata e shkallës së parë në aktgjykim ka dhënë arsyet për faktet vendimtare, ka arsyetuar secilën provë veç e veç  duke i ndërlidhur me njëra tjetrën dhe duke e vërtetuar drejtë dhe në mënyrë të plotë gjendjen faktike

Sipas Apelit, nga shkresat e lëndës, nga dëshmitë e dëshmitarëve dhe palëve të dëmtuara nuk është arritur vërtetohet  pretendimi i prokurorisë se i akuzuari ka bërë porositjen e vrasjes së Mimoza Kusari-Lilës dhe Prek Radit, pasi që nuk është vërtetuar as motivi apo arsyeja që i akuzuari të bëj një gjë të tillë, pasi nuk kishte pasur ndonjë kontest apo konflikt interesi me palët e dëmtuara.

Një gjë të tillë, sipas Apelit e vërteton edhe dëshmia e Mimoza Kusari-Lilës e cila kishte deklaruar se për herë të parë për të akuzuarin ka dëgjuar kur është njoftuar për rastin, se me të njëjtin nuk ka pas asnjë biznes, e as me ndonjë anëtarë të familjes së tij, e që nga kjo nuk mund të vërtetohet as edhe mundësia e të pasurit konflikt interesi

Po ashtu, Apeli e ka vlerësuar si të drejtë faktin se shkalla e parë nuk i kishte falë besimin  dëshmitarit bashkëpunues Gramos Nokshiqit, pasi që dëshmia e tij është kontradiktore jo vetëm me deklaratën e tij, por edhe me dëshmitë tjera të administruara në shqyrtimin kryesor.

Ndryshe, ky rast zhvillohet në bazë të aktakuzës së Prokurorisë Speciale, të datës 28 dhjetor 2015, me të cilën Mikel Qupi, akuzohej se në muajin korrik 2015, kishte planifikuar dhe angazhuar Gramoz Nokshiqin dhe Alberto Sheqerukaj, shtetas të Republikës së Shqipërisë, me qëllim të privimit nga jeta të dëmtuarin Prek Radi dhe ish-kryetaren e Komunës së Gjakovës, Mimoza Kusari-Lila, duke iu premtuar shuma parash deri në 300.000 euro.

Me këtë rast së bashku me të lartcekurit akuzohen të kenë kryer veprën penale “vrasje e rëndë” e mbetur në tentativë lidhur me veprën penale bashkimi kriminal.

Po ashtu Mikel Qupi, akuzohej se deri në muajin korrik 2015, në lokalet e tij kishte poseduar pa leje armë të llojit snajper me dy palë dylbi, në revole “C.Zastava” dhe 400 gram eksploziv.

Prince Coffee shkon edhe në Ferizaj – ambient i ngrohtë e risi në menu (VIDEO)

Sponsoruar