Lajme

Më shumë se 3 milionë euro për Zyrën e Thaçit

Autori: Gazeta inFokus 11:45 | 30 March 2018

Për Zyrën e të parit të vendit, nuk po mjaftojnë as 3 milionë euro. Paga, mëditje, mallra, shërbime dhe subvencione e transfere, Presidenti i vendit, Hashim Thaçi nuk po mund t’i rrumbullaksojë me kaq para.

Janë më se 3 milionë e 200 mijë euro që janë ndarë nga Buxheti i shtetit më të varfër në rajon për zyrën e kreut të shtetit. Pjesa më e madhe e kësaj shumë është paraparë të shpenzohet për kategorinë e mallrave dhe shërbimeve, pasuar nga ajo për pagat dhe mëditjet, shkruan Infokusi.com.

1 milionë e 900 mijë euro do të shkojnë për mallra dhe shërbime dhe 1.1 milionë të tjera për pagat dhe mëditjet e zyrës së Presidentit.

-Advertisement-

Krejt kjo sipas raportit mbi ndarjen dhe shpenzimin e parasë publike “Si i harxhon shteti paret tona?”, që ka publikuar Instituti për Studime të Avancuara- GAP për vitin 2018.

Në bazë të këtij raporti, i pari i vendit ka ndarë kogja para edhe për subvencione e transfere. Më shumë se 270 mijë euro të buxhetit të ndarë për këtë zyrë do të shkojnë për këtë kategori.

Ndonëse në shumë më të vogël, por mijëra euro janë paraparë edhe për shpenzimet kapitale dhe ato komunale.

“Shpenzime kapitale-15 mijë euro, shpenzime komunale- 6 mijë e 700 euro”, thekson tutje raporti i GAP-it.

Ndryshe, ditë më parë edhe Qeveria në krye me Ramush Haradinajt ka ndarë para për këtë zyrë.

“Për nevoja të Këshillit Konsultativ për Komunitete në kuadër të Zyrës së Presidentit, Qeveria ka ndarë mjete në vlerë prej 50 mijë euro. Mjetet e ndara do të përdoren për mbulimin e shpenzimeve të aktiviteteve që kontribuojnë në marrëdhëniet midis komuniteteve të Republikës së Kosovës”, thuhet në një nga vendimet e Qeverisë Haradinaj./Infokusi