Sot në Pallatin e Sporteve në Prishtinë janë zhvilluar ndeshjet gjysmëfinale të edicionit të 9-të të turneut ndërkombëtar “Adem Jashari” në futsall që organizohet nga Federata e Futbollit e Kosovës, shkruan infokusi.

Turneun e shpalli të hapur presidenti i FFK-së, Fadil Vokrri, i cili theksoi rëndësinë e futsallit dhe zhvillimin e hovshëm që ka bërë ky sport në Kosovë në periudhën dhjetëvjeçare. Tutje, presidenti, uroj ekipet pjesëmarrëse për sukses dhe lojëra korrekte, derisa theksoi se ky turne përkon edhe me festimin e 10-vjetorit të futsallit nga FFK si dhe 10 vjetorit të Pavarësisë së shtetit.

Në ndeshjen e parë u ballafaquan Kombëtarja U21 e Kosovës dhe Maqedonia, ku pas një loje interesante në fund fitores iu gëzua ekipi i Maqedonisë, me rezultat 4:1. Të rinjtë e Kosovës, për të cilët ky ishte grumbullimi i parë si ekip, në pjesën e parë luajtën shumë mirë dhe arritën të shkojnë në pushim në epërsi, me golin e realizuar nga Bardh Kelmendi, në minutën e 13-të. Megjithatë, në pjesën e dytë erdhi në shprehje përvoja dhe cilësia e ekipit të Maqedonisë, që arriti ta përmbysë rezultatin me golat e shënuar nga Zorann Levevski (26’), Martin Todojevski (32’) dhe Taulant Ismajli (34’, 39’).

-Advertisement-

Ndeshje shumë më interesante dhe më rivalizuese ishte ajo ndërmjet Kombëtares së Kosovës dhe Kombëtares së Shqipërisë, ku finalisti u caktua vetëm pas vazhdimeve. Kosova e nisi shumë mirë ndeshjen dhe kaloi në epërsi qysh në minutën e parë, me golin e Jeton Rukovcit.

Epërsinë në 2:0 e shtoi Fadil Goli, në minutën e 16-të. Megjithatë, Shqipëria brenda dy minutave përmbysi shifrat, me golat e Mentor Mejzinit (19’) e Besnik Rexhepajt (19’, 20’). Më pas Kosova shënoi dy herë për të kaluar në epërsi nëpërmjet Ramadan Alajt (22’) e Arbër Dobroshit (35’). Shqipëria barazoi vetëm një minute më vonë, me Besnik Rexhepajn, derisa epërsinë e Kosovës e riktheu Fadil Goli, në minutën e 38-të. Kur u mendua se Kosova do të kualifikohej në finale, 9 sekonda para përfundimit të ndeshjes kuqezinjtë i barazuan shifrat, me golin e Narcis Alibegut. Ndërkohë, në vazhdimet dy herë nga 5 minuta, Shqipëria realizoi dy gola dhe më pas arriti ta administrojë rezultatin deri në fund, duke kaluar në finale.

Kësisoj, nesër në orën 15:00, në ndeshjen për vendin e tretë do të takohen Kosova A – Kosova U21 dhe në orën 17:00 në finale, do të luajnë Shqipëria – Maqedonia./infokusi.com

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-