Lajme

Arifi: Takimi i radhës në Bruksel me palën serbe do të jetë më 26 shkurt

Autori: Gazeta inFokus 14:16 | 20 February 2018

Shefi i negociatave me Serbinë, Avni Arifi ka theksuar se ata me 26 shkurt do të jenë pjesë e bisedimeve palën serbe në Bruksel.

Ai këto komente i ka bërë në Komisionin për Punë të Jashtme, ku ka prezantuar anëtarët e këtij ekipi, duke ftuar që të gjitha partitë politike të kenë përfaqësuesit e tyre në këtë Komision.

“Ne asnjëherë nuk jemi takuar me përfaqësuesit serb në dialog. Me 26 takimin e radhës, do të bisedohet për implementimin e marrëveshjeve të arritura, në të cilat ka pasur ngecje. Në shumicën e marrëveshjeve del se Kosova i ka kryer obligimet, ku secila marrëveshje është me rëndësi të implementohet. Shembull është marrëveshja për tabelat e veturave, ku për shkak të procedurave të tenderit të vonuara nuk kemi mundur t’i implemtojmë. Më pas e kemi marrëveshjen për energji që është vitale, ku ne si qeveri konsiderojmë se marrëveshja e arritur duhet të implemtohet. Synojmë përmbylljen e dialogut, edhe arritjen e bazës për arritjen e marrëveshjes politike”, ka shtuar Arifi.

-Advertisement-

Ai më tutje ka theksuar se ata po synojmë me mbyll dialogun në tërësi, dhe duhet të ketë sipas tij, zbatueshmëri të plotë për secilën marrëveshje veç e veç.

Në anën tjetër, kryetarja e Komisionit për Punë të Jashtme, Vjosa Osmani, ka kërkuar sqarime nga Arifi në lidhje me atë se cili do të jetë qëndrimi i ekipit negociator për Asociacionin e Komunave me shumicë serbe dhe Marrëveshjen për Drejtësi.

Arifi ka thënë se qëndrimi për Asociacionin do të jetë në linjë me qëndrimin e Qeverisë së Kosovës, duke e respektuar sipas tij, vendimin e Gjykatës Kushtetuese, e cila herën e kaluar kishte gjetur 22 shkelje të Kushtetutës së vendit, në tekstin e këtij mekanizmi.

“Varësisht nga vendimi i Kushtetutës, do të bëhet draftimi ose amandamentimi i propozimit të ri. Kjo Qeveri nuk e pranon Asociacionin që përmban shkelje kushtetuese”, ka shtuar ai.

Sipas tij, nuk do të ketë marrëveshje të reja në mes Prishtinës dhe Beogradit, pa u implementuar në tërësi marrëveshjet e arritura më parë.

Subscribe në YouTube: GAZETA INFOKUSI