Kosova nuk mund ta dërgojë në arbitrazh ndërkombëtar çështjen e demarkacionit me Malin e Zi. Kështu thonë njohësit e marrëdhënieve ndërkombëtare, duke mohuar në këtë mënyrë mundësinë e arbitrazhit, të cilën të enjten e përmendi edhe kryeministri Ramush Haradinaj, i cili tha se arbitrazhi ndërkombëtar është opsion për zgjidhjen e kësaj çështjeje.

Politologu Ramush Tahiri thotë se janë dy arsye që Kosova nuk mund ta ndërmarrë një hap të tillë.

“Në arbitrazh ndërkombëtar nuk mund të shkojë, sepse njëherë Kosova nuk mund të ngritë çështje në arbitrazh, sepse e ka mangësinë e subjektivitetit ndërkombëtar, e dyta-nuk ka kontest. Kjo do të jetë një çështje e brendshme e Kosovës, por faktikisht që po tregohet një joseriozitet karshi bashkësisë ndërkombëtare dhe karshi Malit të Zi”, tha Tahiri për Radio Kosovën.

-Advertisement-

Ndër punët e para të kryeministrit Haradinaj, ishte emërimi i komisionit të ri për demarkacionin me Malin e Zi.

Haradinaj ka thënë se është në pritje të rezultateve të këtij komisioni, për të vepruar tutje. Sido që të jetë, politologu Tahiri e sheh të vështirë mundësinë e rinegocimit të marrëveshjes.

“Përndryshe marrëveshja ndërkombëtare me Malin e Zi mund të hedhet poshtë nga qeveria, por qeveria e kaluar e ka miratuar. Por, nuk shoh ndonjë arsye që tash me marrëveshje të re mund të kapërcehet marrëveshja e vjetër”, tha Tahiri.

Nënshkruesi i marrëveshjes aktuale, ish ministri i Jashtëm, Hashim Thaçi, tani presidenti i vendit, ditë më parë ka bërë thirrje që të mos humbet kohë me këtë çështje.

“Nëse ne duam liberalizim të vizave, demarkacioni, në përputhshmëri me marrëveshjen e arritur në gusht 2015, duhet të kalojë në Kuvendin e Kosovës. Pra, tash është përgjegjësi e jona t’i bëjmë dy të tretat në Kuvend dhe ky proces të kalojë”, ka thënë Thaçi.

Por, pikërisht mosarritja e dy të tretave të votave në Kuvend, ka bërë që tash e më shumë se dy vjet kjo çështje të mbetet pezull, e rrjedhimisht, siç thonë zyrtarët e BE-së, të mbetet pezull edhe procesi i liberalizimit të vizave për qytetarët e Kosovës.

Kreu i Qeverisë, Ramush Haradinaj, të enjten tha se është në dijeni për qëndrimin e presidentit, por theksoi se nuk ka shanse që në Kuvendin e Kosovës të sigurohen dy të tretat e votave për versionin aktual të demarkacionit, duke lënë mundësinë që këtë çështje ta zgjidhë arbitrazhi ndërkombëtar.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-