Lajme

Kush është profesori shqiptar që u arrestua për terrorizëm në Malajzi?

Autori: Gazeta inFokus 11:11 | 09 October 2017

Shqiptari i arrestua tre ditë më parë në Malajzi për terrorizëm quhet Klodian Zaimi dhe është nga Cërriku. Ka mbaruar studimet ne Jordani për teologji.

Zaimi në Malajzi mbante emrin fetar Ibrahim Zaimi. Sipas mediave në Shqipëri ai është dhëndri i një hoxhe të njohur në Elbasan.

Lajmin për arrestimin e tij u dha fillimisht nga mediat malajzeze. Në përgjigje të interesimit të medias, Policia Shqiptare konfirmoi të dielën arrestimin e tij por dha vetëm inicialet. Sipas policisë, 35 vjeçari shqiptar banonte dhe punon prej vitesh në Malajzi.
“Një nga 8 të arrestuarit në Malajzi, të dyshuar për terrorizëm, është shtetasi shqiptar Z.K., i cili banon dhe punon prej vitesh ne ate shtet ku dhe ka mbaruar studimet e larta. Strukturat e specializuara të Antiterrorit në Policinë e Shtetit janë duke punuar intensivisht për rastin në fjalë si dhe për të zbuluar nëse ka persona të tjerë të implikuar në këtë aktivitet kriminal. Policia e Shtetit po bashkëpunon me agjensitë e tjera ligjzbatuese e inteligjente në vend dhe jashtë saj, duke shkëmbyer të dhëna”, thuhet në njoftimin zyrtar të policisë.

-Advertisement-

Sakaq, referuar mediave vendase mësojmë se grupi ishte i përbërë nga 4 malajzianë, 3 filipinas dhe 1 shqiptar. Operacionet për arrestimin e tyre u bënë në 3 qytete të ndryshme të vendit.

Sipas policisë malajzeze, shtetasi shqiptar luante një rol drejtues në grupin e të arrestuarve dhe detyra e tij ishte të mbante lidhjet me Shtetin Islamik. Krahas lidhjeve me ISIS, policia thotë se grupi vepronte edhe për të bërë rekrutime për organizatën terroriste Al Kaeda.

Sipas zyrtarëve, ata kishin planifikuar sulme në tempuj, kisha dhe xhami për të shkaktuar konflikte midis grupeve të ndryshme fetare. /Opinion.al

Subscribe në YouTube: GAZETA INFOKUSI