Ndërsa gjyqi i ngarkuar politikisht i ish-komandantit të Srebrenicës Naser Oriq po shkon drejt fundit, prokuroria boshnjake u shpreh se ai duhet të dënohet për vrasjen e tre ushtarëve serbë në vitin 1992.

Në deklaratën e tij mbyllëse të martën, prokurori Miroslav Janjiq tha në Gjykatën Shtetërore në Sarajevë se ish-komandanti i Ushtrisë Boshnjake Oriq dhe ushtari tjetër Sabahudin Muhiq duhet të shpallen fajtorë për krime lufte kundër të burgosurve të luftës.

Prokurori argumentoi se dëshmitë e dëshmitarëve kishin vërtetuar se Oriq dhe Muhiq ishin përgjegjës për vrasjet e paligjshme të tre ushtarëve serbë në fshatrat Zalazje, Lolici dhe Kunjerac afër Bratunacit në 1992.

Janjiq përmendi kryesisht deklaratat e dhëna nga një dëshmitar i mbrojtur i koduar O-1, i cili tha se ai personalisht pa vrasjen e ushtarit rob Slobodan Iliq, i cili ishte gjithashtu gjykatës.

“Dëshmitari O-1 dha një përshkrim të hollësishëm të vrasjes së gjyqtarit Iliq, i cili u kap bashkë me tre ose katër anëtarë të Ushtrisë Serbe të Bosnjës më 12 korrik 1992”, tha prokurori.

“Dëshmitari tha se Oriq e qëlloi Iliqin në gjoks dhe në kokë. Gjetjet nga eksperti Rifat Kesetoviq konfirmuan thyerje të shumta të kockave në trupin e Iliqit”, shtoi Janjiq.

Sipas akuzave, Oriq ishte komandant i njësive të Mbrojtjes Territoriale të Ushtrisë Boshnjake në Srebrenicë dhe Muhiq ishte anëtar i forcave të tij.

Prokuroria citoi gjithashtu dëshminë e dëshmitarit Ibran Mustafiq, i cili tha se ndërsa Oriq ishte në apartamentin e tij, pranoi se kishte vrarë Slobodan Iliqin.

Duke komentuar vrasjet e dy robërve të tjerë serbë- Milutin Miloseviqit dhe Mitar Saviqit, prokurori tha se ishte konfirmuar nga dëshmitarët se Oriq dhe Muhiq kishin qëlluar ndaj tyre.

Çështja kundër Oriqit ka tërhequr kritika nga boshnjakët që e shohin atë si një hero për rolin e tij në mbrojtjen e Srebrenicës në vitet para masakrave të vitit 1995.

Ajo është kritikuar gjithashtu nga viktimat serbe të luftës, të cilët kanë pohuar se akuzat kundër Oriqit janë shumë modeste.

Ndërkohë, avokatja e Oriqit u shpreh se ai ishte gjykuar dhe liruar më parë nga akuzat nga Gjykata e Hagës, kështu që gjykimi i tij përsëri në Sarajevë ishte i padrejtë.

Mbrojtja do të paraqesë deklaratat e saj mbyllëse në gjyq më 12 shtator.

UNI – Universum International College sërish pjesë e Panairit të Edukimit, vazhdon të ofroj studime me standarde amerikane

Sponsoruar