Sport

Berisha: Duam të vazhdojmë me fitore

Autori: Gazeta inFokus 10:27 | 09 August 2017

Përfaqësuesja e Kosova do të luajë sot ndaj Estonisë, nga ora 17:30, në kuadër të para-elevatorëve për Kupën e Botës ‘Kina 2019’

Dardan Berisha, kapiten i përfaqësueses së Kosovës, thotë se ekipi kosovar është i gatshëm për ndeshjen ndaj Estonisë.

Ylli i Sigal Prishtinës thotë se ekipi i Kosovës dëshiron të vazhdojë ecurinë pozitive në këto para-eliminatore, pasi në takimin e parë, të zhvilluar në Prishtinë, mposhtën Maqedoninë.

“Fitorja ndaj Maqedonisë na ka motivuar shumë, por tani e kemi harruar atë pjesë, dhe po mendojmë vetëm për ndeshjen kundër Estonisë, sepse duam të vazhdojmë me ecurinë pozitive në këtë garë”, ka deklaruar Berisha.

-Advertisement-

“Kemi punuar gjatë tërë javës dhe jemi fokusuar në ato pjesë ku kemi pas nevojë, andaj në ndeshjen e së mërkurës besojmë se do të jemi më se të gatshëm të përballemi me Estoninë, skuadër kjo shumë e fortë, që edhe e dëshmoi ndaj Maqedonisë”, ka theksuar ai.

Me 12 gusht Kosova udhëton në Shkup për t’u përballur sërish me Maqedoninë, dhe krejt në fund, më 19 gush,t e pret Estoninë në shtëpi.

Duhet theksuar se dy skuadrat e para do të arrijnë të vazhdojnë tutje në kualifikimet për Kupën e Botës, fazë kjo e cila do të fillojë në muajin nëntor.

Të tri ndeshjet e radhës të Përfaqësueses sonë do të transmetohen drejtpërdrejtë në Radiotelevizionin e Kosovës (RTK).

Subscribe në YouTube: GAZETA INFOKUSI