Kur kanë mbetur kutitë e fundit për t’u numëruar, trendi i projeksionit parashikon një fitore të thellë të Partisë Socialiste, e cila deri në mesnatë kishte siguruar 74 mandate, kundrejt PD-së me 43 mandate, ndërsa LSI-ja numëronte 19 mandate, PDIU 3 mandate dhe PSD 1 mandat. Teksa janë numëruar afër 90 për qind e kutive nga 5362 në total në të gjithë Shqipërinë, PS udhëheq me 48.2% të votave, e ndjekur nga PD me 28.8% të votave dhe LSI me 14.4 % të votave.

Procesi i numërimit të votave ka përfunduar në Korçë, në Vlorë, Fier, Gjirokastër. Ndërsa PS sheh rritje të ndjeshme në vota në krahasim me 4 vite më parë, e kundërta ndodh me PD që është rrudhur në shifra në këto zgjedhje. Por rritje në shifra nuk ka vetëm PS. Një rritje ka njohur edhe LSI që duket se do të ketë më tepër deputetë sesa në legjislaturën e lënë pas. Ndërkohë që në Parlament duket se do të jetë edhe PDIU, edhe pse bazuar në numërimin e deritanishëm do të ketë më pak përfaqësues në Parlamentin e ardhshëm.

Gara në kryeqytet

Në bazë të këtij numërimi udhëheq PS-ja me 18 mandate, duke u ndjekur nga PD-ja me 11 mandate, e cila e humbet në kutitë e fundit 1 mandat, të fituar nga LSI. Sipas këtij rezultati paraprak, nënkryetari i kësaj partie, Luan Rama, i renditur i 5-ti në listën e LSI, arrin të hyjë në Parlament. Po ashtu në mesnatë gara është hapur dhe për mandatin që gjatë gjithë ditës u mendua se do ti takonte PDIU-së. Duke parë projeksionin që po zhvillohej në Tiranë, orekset për fituar këtë mandat i ka si PS-ja.

Janë pikërisht kutitë e fundit që do të vendosin për fatin e këtij mandati. Ndërkohë ajo që pritet të jetë surpizë në kryeqytet, LIBRA nuk ka arritur të kalojë pragun. Pra shanset që Ben Blushit të jetë në Parlamentin e ri tashmë janë shuar. Një tjetër parti që nuk ka arritur të sigurojë votat e mjaftueshme për të fituar mandat në Tiranë është dhe SFIDA e Gjergj Bojaxhiut e cila zhgënjyer në kryeqytet, duke kapur jo më shumë se 0.5% të votave.

Dështimi i PD-s

Kreu i PD Lulzim Basha ka pësuar humbje jo vetëm në gjithë territorin e Shqipërisë. Humbje ka pësuar edhe në lagjen e vet. Gjatë fushatës Basha nxori spot edhe në lagjen e vet, por fatkeqësisht as kjo nuk i ka sjellë sukses. Nga rezultatet përfundimtare, PS kryeson, ndërsa PD është e dyta edhe në lagjen e Bashës. Rezultate të dobët PD ka marrë dhe në pjesën më të madhe të njësive, përjashto KZAZ 47 në qarkun e Tiranës, që i përket Bashkisë së Kamzës ku kreu i degës së PD-së në Kamëz, Xhelal Mziu ka shpallur tashmë fitoren në këtë zonë, duke thënë se PD është 6% më shumë se koalicioni qeverisës. “Janë edhe dy kuti për tu numëruar.

Unë e konsideroj një arritje të Kamzës, këtë rezultat, pasi nuk duhet të përjashtojmë rolin që ka luajtur koalicioni qeverisës, që kanë përdorur arsimin, OSHEE dhe legalizimet”, tha Mziu. Duke u mbështetur në rezultatin e përgjithshëm të forcës që ai përfaqëson, Partisë Demokratike, Mziu shton se humbjen e PD-së e ka sjellë kanabizimi i vendit. “Ngelem shpresëplotë se numri i deputetëve do jetë edhe më i madh se kaq sa kemi tani. Në Shqipëri fajin kryesor e ka kanabizimi, dhe instrumente të tjerë shtrëngues. Duke marrë shkasë nga zgjedhjet e Dibrës, ku kam qenë vetë prezent kam parë që vota është tjetërsuar”, tha Mziu.

Çka do të thotë të gatuash shqip?

Sponsoruar