Lajme

Kënga serbe për Kosovën në Bruksel, Rama: S’e di nëse ishte e qëllimshme apo nga padija, por ishte fyerje e rëndë

Autori: Gazeta inFokus 16:35 | 16 November 2026

Kryeministri i Shqipërisë, Edi Rama, kritikoi interpretimin e një kënge nacionaliste serbe, e cila pretendon se Kosova është pjesë e Serbisë, në hapjen e Samitit të Zgjerimit të BE-së, duke shkaktuar zemërim në rajon.

“Nuk e di nëse ishte e qëllimtë apo rezultat i injorancës apo fakti që një këngë pa shije nacionaliste u interpretua në prag të këtij forumi në të kundërtën të gjithçkaje që përfaqëson. Dhe për t’i shtuar plagës edhe fyerjen, u interpretua nën titullin e bukur Meloditë e Unitetit”, tha Rama.

“Nuk është vetëm se i lëndojnë ndjenjat e Shqipërisë apo të kombit shqiptar, apo të qytetarëve shqiptarë të Republikës së Kosovës, por bëhet fjalë për nevojën që të heqim dorë nga gjithçka që na kthen në të kaluarën”, vazhdoi ai.

-Advertisement-

Grupi slloven Marko Hatlak & Kapobanda interpretoi këngën “Oj Kosovo, Kosovo” të dielën në mbrëmje, në koncertin që hapi konferencën vjetore të Komisionit Europian për zgjerimin.

Interpretimi i një kënge kaq të ngarkuar politikisht në një konferencë të organizuar nga Komisioni shkaktoi zemërim në Kosovë, e cila e konsideroi atë provokim.

“Kjo nuk është shkëmbim kulturor. Kënga përçon pretendime të qarta politike mbi territorin e Republikës së Kosovës. Përfshirja e saj në një aktivitet zyrtar të Komisionit Europian, kushtuar zgjerimit, unitetit dhe marrëdhënieve të mira fqinjësore, është e papranueshme”, tha Agron Bajrami, ambasadori i Kosovës në Belgjikë, në X.

Grupi muzikor duhej të interpretonte nga një këngë për secilin vend kandidat, përfshirë Kosovën, e cila nuk ka status formal të vendit kandidat dhe nuk njihet si shtet nga pesë vende të BE-së. Megjithatë, kënga e zgjedhur për Kosovën është serbe si në gjuhë, ashtu edhe në përmbajtje.

“Më vjen keq për zgjedhjen e këngës nga muzikantët. Ajo prek ndjenja të ndjeshme. Veçanërisht duke pasur parasysh historinë e dhimbshme dhe përvojat e ndryshme të komuniteteve në Kosovë, të cilat vijnë nga kjo zonë”, u tha gazetarëve të hënën komisionerja për Zgjerim, Marta Kos.

“Dua të theksoj se kjo këngë në asnjë mënyrë nuk pasqyron qëndrimin e Komisionit Evropian apo timin lidhur me Kosovën dhe historinë e saj. Ajo që është e qartë është se ne nuk mund ta ndryshojmë të kaluarën tonë të përbashkët, por mund ta zgjedhim të ardhmen tonë të përbashkët”, vazhdoi Kos.

Kënga u shkrua pas fjalimit historik të Slobodan Miloševićit në Gazimestan më 1989, në të cilin presidenti i atëhershëm serb e paraqiti Kosovën si zemrën e identitetit kombëtar serb, në prag të luftërave jugosllave.

“Ne të gjithë duhet të angazhohemi për transformimin e fqinjësisë sonë. Për këtë bëhet fjalë e gjithë kjo. Sepse, në fund të fundit, ne nuk po kërkojmë të vijmë këtu. Ne po kërkojmë ta sjellim Europën atje”, shtoi Rama.

Düsseldorf–Prishtinë, dy fluturime në ditë – rezervoni me PrishtinaTickets
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy