Lajme

INDEP ngre alarmin: Faturat e ulëta të rrymës mund të fshehin varfërinë energjetike në Kosovë

Autori: Gazeta inFokus 17:14 | 10 September 2026

Organizata joqeveritare Instituti për Politika Zhvillimore (INDEP) ka publikuar Qarkoren e Energjisë me titull “Fatura e ulët që fsheh varfërinë – Si vetëkufizimi i konsumit i bën familjet e varfra të padukshme për politikat publike”, përmes së cilës ngre shqetësime për mënyrën se si identifikohet varfëria energjetike në Kosovë.

Sipas INDEP-it, një faturë e ulët e energjisë elektrike nuk nënkupton domosdoshmërisht se energjia është e përballueshme për një familje.

Organizata thekson se një pjesë e familjeve mund t’i mbajnë faturat e ulëta duke u detyruar të kufizojnë konsumin, si për shembull duke ngrohur vetëm një dhomë, duke reduktuar ndriçimin dhe gatimin apo duke hequr dorë nga përdorimi i pajisjeve dhe shërbimeve energjetike që u nevojiten.

-Advertisement-

Në analizën e saj, INDEP trajton edhe mënyrën se si Kosova e identifikon dhe mat varfërinë energjetike, përfshirë kriterin prej 250 kWh të përdorur nga Fondi i Kosovës për Efiçiencë të Energjisë.

Sipas organizatës, problem mbetet edhe mungesa e një treguesi që do të identifikonte nënkonsumin e energjisë, ndërsa analiza shqyrton edhe përputhjen e sistemit aktual me standardet e Bashkimit Evropian dhe të Komunitetit të Energjisë.

INDEP argumenton se fatura e ulët nuk duhet të konsiderohet automatikisht tregues i mirëqenies apo efiçiencës energjetike.

Për të krijuar një pasqyrë reale të gjendjes së familjeve, sipas organizatës, nevojiten edhe të dhëna për temperaturën në banesë, numrin e dhomave që ngrohen, gjendjen e objektit, të ardhurat dhe nevojat e familjes.

Pa këto të dhëna, INDEP paralajmëron se familjet që kufizojnë konsumin për shkak të pamundësisë financiare mund të mbeten të padukshme për politikat publike.

Qarkorja është publikuar me mbështetjen e Heinrich Böll Stiftung, në kuadër të projektit “Prosper+III: Governing Energy Poverty in Kosovo”.

Udhëto Oslo – Prishtinë çdo javë me PrishtinaTickets
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy