Lajme

Nesër dorëzohen nënshkrimet për thirrjen e Kuvendit të Jashtëzakonshëm të LDK-së, kërkohet shkarkimi i Abdixhikut

Autori: Gazeta inFokus 14:23 | 13 July 2026

Lëvizja për thirrjen e një Kuvendi të Jashtëzakonshëm në Lidhjen Demokratike të Kosovës pritet të hyjë në një fazë të re gjatë ditës së nesërme.

Burime të Gazetës Infokus bëjnë të ditur se një grup delegatësh të LDK-së pritet të dorëzojnë zyrtarisht nënshkrimet e mbledhura për mbajtjen e Kuvendit të Jashtëzakonshëm, ku pritet të hapet debat edhe për udhëheqjen aktuale të partisë.

Sipas informacioneve të siguruara nga Infokusi, pakënaqësitë brenda partisë janë intensifikuar pas rezultateve të fundit zgjedhore, me një pjesë të strukturave që vlerësojnë se LDK-ja nuk ka arritur të kapitalizojë politikisht zhvillimet e viteve të fundit dhe as të rikthehet në nivelin që synon elektoralisht.

-Advertisement-

Burimet thonë se nënshkrimet janë mbledhur në vazhdimësi gjatë javëve të fundit dhe se dorëzimi i tyre do të shënonte hapin e parë formal drejt procedurave statutare për thirrjen e Kuvendit.

Nëse procedura ecën përpara, një nga temat kryesore që pritet të diskutohet është edhe përgjegjësia e kryesisë aktuale për rezultatet zgjedhore, përfshirë pozitën e kryetarit Lumir Abdixhiku.

Zërat kritikë brenda partisë kanë shtuar presionin ndaj kreut të LDK-së muajt e fundit, ndërsa debate të brendshme kanë shpërthyer edhe publikisht mes figurave të ndryshme të partisë.

Pavarësisht kësaj, Abdixhiku ka bërë të qartë se nuk e sheh dorëheqjen si opsion. Në një deklarim të bërë më 9 korrik, ai tha se nuk planifikon të largohet nga drejtimi i LDK-së.

Kujtojmë se në fillim të vitit 2026, Abdixhiku kaloi një proces votëbesimi brenda partisë, ku delegatët vendosën ta konfirmojnë në krye të LDK-së. Megjithatë, sipas burimeve të Infokusit, zhvillimet e fundit tregojnë se pakënaqësitë nuk janë zbehur dhe se një pjesë e delegatëve po kërkojnë rihapjen e debatit për drejtimin e partisë./GazetaInfokus

Teknologjia në kuzhinë nuk është vetëm çështje komoditeti, por edhe kohe: Njihuni me pllakën inovative me induksion Miele KM 8000!
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy