Lajme

Organizatat që monitorojnë përzgjedhjen e drejtorit të RTK-së: Nuk do ta vlerësojmë procesin shkaku i presionit politik ndaj transmetuesit publik

Autori: Gazeta inFokus 11:22 | 13 July 2026

Asociacioni i Gazetarëve të Kosovës (AGK), Lëvizja FOL, Instituti i Kosovës për Drejtësi (IKD) dhe juristja e së drejtës së medias, Flutura Kusari, kanë njoftuar se nuk do ta vlerësojnë procedurën për përzgjedhjen e drejtorit të përgjithshëm të Radio Televizionit të Kosovës (RTK).

Përmes një deklarate të përbashkët, ata kanë bërë të ditur se ky vendim është marrë pas monitorimit të vazhdueshëm të RTK-së dhe shqetësimeve për gjendjen aktuale në transmetuesin publik.

Sipas tyre, RTK-ja aktualisht po përballet me presion politik, i cili manifestohet në forma të ndryshme, përfshirë ndërhyrjet në përmbajtjen e lajmeve, presionin ndaj gazetarëve dhe problemet financiare që, sipas deklaratës, kanë rezultuar edhe me vonesa në pagesën e pagave.

-Advertisement-

“Në këto rrethana, ne jemi të bindur se Bordi i RTK-së nuk gëzon lirinë për të vepruar sipas bindjeve profesionale në përzgjedhjen e drejtorit të ardhshëm të Transmetuesit Publik”, thuhet në reagim.

Megjithatë, organizatat dhe juristja kanë bërë të ditur se do të vazhdojnë të monitorojnë mbledhjet e RTK-së, përfshirë edhe ato që lidhen me procesin e zgjedhjes së drejtorit të përgjithshëm.

“Ne do të vazhdojmë të monitorojmë mbledhjet e RTK-së, përfshirë edhe takimet për përzgjedhjen e drejtorit të përgjithshëm, por nuk do të ofrojmë vlerësim për këtë proces”, thuhet në deklaratë.

Deklarata është nënshkruar nga Asociacioni i Gazetarëve të Kosovës, Lëvizja FOL, Instituti i Kosovës për Drejtësi dhe Flutura Kusari./GazetaInfokus

Teknologjia në kuzhinë nuk është vetëm çështje komoditeti, por edhe kohe: Njihuni me pllakën inovative me induksion Miele KM 8000!
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy