Lajme

Gërvalla takon Kallasin: Mbështetja për Kosovën s’mund të mbetet në nivel deklarativ, duhet të përkthehet në hapa konkretë

Autori: Gazeta inFokus 10:28 | 14 Prill 2025

Ministrja e Punëve të Jashtme dhe Diasporës së Kosovës, Donika Gërvalla, ka zhvilluar një takim me Përfaqësuesen e Lartë të Bashkimit Evropian për Punët e Jashtme dhe Politikën e Sigurisë, Kaja Kallas.

Gjatë këtij takimi, Gërvalla theksoi rëndësinë e rolit që luan Bashkimi Evropian, jo vetëm për ruajtjen e stabilitetit, por edhe për ofrimin e vizionit dhe drejtësisë për të gjithë qytetarët e kontinentit, shkruan Gazeta Infokus.

Ministrja theksoi nevojën që Republika e Kosovës të trajtohet si një partnere e barabartë dhe e respektuar në të gjitha proceset integruese evropiane, duke përfshirë përshpejtimin e rrugës drejt anëtarësimit në BE dhe organizata të tjera ndërkombëtare.

-Advertisement-

Sipas Gërvallës, mbështetja për Kosovën nuk duhet të mbetet vetëm në deklarata, por duhet të përkthehet në hapa konkretë, përfshirë përmbylljen e procesit të anëtarësimit në Këshillin e Evropës, avancimin e aplikimit për anëtarësim në BE dhe heqjen e masave që cenojnë frymën e partneritetit.

Ajo ritheksoi se e ardhmja evropiane e Ballkanit Perëndimor nuk mund të jetë e plotë pa pjesëmarrjen e Kosovës.

“Mbështetja për Republikën e Kosovës është mbështetje për një Evropë më demokratike, më të barabartë dhe më të bashkuar,” thuhet në njoftim.

Gërvalla theksoi gjithashtu se angazhimi i Kosovës në rajon përbën një faktor të rëndësishëm të stabilitetit dhe sigurisë për të gjithë kontinentin. Ajo u bëri thirrje vendeve anëtare të BE-së për vendime të guximshme dhe një vizion të përbashkët evropian që përfshin edhe Kosovën si pjesë të natyrshme të tij.

Etiketa:
Comodita Home rikthen “Garage Sale” për edicionin e tetë, me zbritje deri në 70%
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy