Oda Ekonomike e Kosovës ka reaguar lidhur me zhvillimet e fundit, ku në një përplasje publike u përfshinë presidentja e vendit, Vjosa Osmani, dhe ministri i Financave, Hekuran Murati, në lidhje me tarifën doganore prej 10% ndaj produkteve nga SHBA-ja.

OEK ka shprehur mbështetjen e saj për thirrjen e presidentes Osmani për heqjen e kësaj tarife dhe vendosjen e rregullave të reja në raportet tregtare ndërmjet Kosovës dhe Shteteve të Bashkuara të Amerikës.

“Oda Ekonomike e Kosovës mbështet thirrjen e Presidentes Osmani drejtuar Qeverisë së Republikës së Kosovës për heqjen e tarifave doganore për mallrat amerikane. Kjo thirrje fuqizon edhe kërkesën tonë të mëhershme për pezullimin e këtyre tarifave, duke nënvizuar rëndësinë e forcimit të marrëdhënieve ekonomike me SHBA-në si aleat strategjik,” thuhet në reagimin zyrtar të OEK-ut.

-Advertisement-

Në këtë reagim theksohet se një vendim i tillë do të hapte rrugë të reja për zhvillimin ekonomik të vendit, shkruan Gazeta Infokus.

“Oda Ekonomike e Kosovës konsideron se heqja e tarifave doganore për produktet amerikane do të krijonte mundësi të reja për zhvillimin ekonomik të Kosovës dhe do të kontribuonte në rritjen e tregtisë dhe investimeve. Ky veprim do të forconte marrëdhëniet me aleatin më të rëndësishëm strategjik të Kosovës, Shtetet e Bashkuara të Amerikës, dhe do të përfaqësonte një hap të madh drejt një tregtie më të lirë,” thuhet më tej në reagim.

OEK shton se veprimet që forcojnë lidhjet me partnerët ndërkombëtarë, sidomos ato të bazuara në interesa dhe vlera të përbashkëta ekonomike, janë thelbësore për të ardhmen e vendit.

“Në këtë kuadër, Oda Ekonomike e Kosovës i bën thirrje Qeverisë së Kosovës që të veprojë shpejt dhe të marrë vendime të duhura për heqjen e tarifave doganore dhe avancimin e partneritetit ekonomik me SHBA-në,” përfundon reagimi.

Këto deklarata vijnë pas vendimit të fundit të ish-presidentit amerikan, Donald Trump, për të vendosur një tarifë 10% ndaj produkteve nga Kosova, një masë e cila preku edhe shumicën e shteteve të tjera.

Ndërkohë, gjatë ditës së djeshme, edhe Oda Ekonomike Amerikane në Kosovë bëri të ditur se edhe Kosova ka vendosur një tarifë të njëjtë ndaj produkteve amerikane dhe i bëri thirrje Qeverisë që ta heqë atë./Gazeta Infokus 

Oda Amerikane përsërit thirrjen për heqjen e tarifave ndaj mallrave amerikane, mbështet kërkesën e Osmanit

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-