Presidentja e Kosovës, Vjosa Osmani nga selia e NATO-s iu drejtua dje qytetarëve të vendit.

Ajo tha se përsëri Kosova ka marr përkushtimin e plotë të aleatëve që të vazhdojnë të punojnë me Kosovën, që të vazhdojnë prezencën e tyre në Kosovë në kuadër të punës të përbashkët dhe angazhimit të përbashkët për paqe, siguri dhe stabilitet në të gjithë rajonin.

Osmani nga kjo seli foli edhe për, siç tha ajo, grupet kriminale serbe që janë një sfidë për vendin.

“Natyrisht që shumë nga sfidat me të cilat ballafaqohemi, në veçanti ato në veri të vendit për shkak të grupeve të organizuara kriminale serbe i diskutuam sot, duhet të punojmë me partnerët tanë në mënyrë që t’i zgjidhim të gjitha këto sfida të sigurisë” – tha ajo.

Tutje e para e vendit shtoi se çështja e sigurisë asnjëherë nuk është individuale, sipas saj është gjithnjë kolektive.

“Kosova siç e dini është shteti më pro NATO jo vetëm në rajon, por në të gjithë botën sepse vizioni i qartë i qytetarëve të Kosovës dhe institucioneve të Republikës është që të anëtarësohemi në këtë aleancë” – tha Osmani teksa kujtoi se kjo aleancë në vitin 1999 shpëtoi jetën e qytetarëve të Kosovës.

“Edhe sot e kësaj dite vazhdon me kontributin që të gjithë qytetarët e Kosovës të jetojnë në paqe” – vazhdoi tutje presidentja.

Ajo tha se në këto 25 vite Kosova e ka dëshmuar që është partner i NATO-s dhe do të vazhdojë ta dëshmojë këtë edhe sot e tutje dhe natyrisht do të vazhdojë të koordinohet me partnerët në të mirë të të gjithë qytetarëve.

“Këtu mbrapa meje janë flamurët e shteteve anëtare të NATO-s, do të punojmë të gjithë së bashku që edhe flamuri i Republikës së Kosovës shumë shpejtë të valoj së bashku me flamurët e aleatëve” – tha Osmani.

Ishte Sekretari i Përgjithshëm i NATO-s, Jens Stoltenbeg ai i cili priti dhe takoi Osmanin.

Pas takimit, Stoltenberg deklaroi se mirëpret hapat e fundit e ndërmarrë nga Prishtina për të ulur tensionet duke përfshirë, zvogëlimin e numrit të forcave speciale të Policisë së Kosovës në veri, teksa shoti se është esenciale që të shmangen çfarëdo eskalimi i mëtejmë.

“I mirëpres hapat e fundit që janë ndërmarrë nga Prishtina për të ulur tensionet duke përfshirë, zvogëlimin e numrit të forcave speciale të Policisë së Kosovës në veri dhe planet për të mundësuar zgjedhjet e reja komunale”- tha Sekretari i Përgjithshëm i NATO-s.

“Është esenciale që të shmangen çfarëdo eskalimi i mëtejmë dhe i inkurajojmë të dyja palët që të veprojnë në përputhje me zotimet e tyre”- shtoi ai.

Stoltenberg u shpreh se NATO mbështet dialogun e ndërmjetësuar nga Bashkimi Evropian dhe se mirëpret takimin e javës së ardhme në nivel të lartë.

“NATO mbështetë fuqimisht dialogun e ndërmjetësuar nga BE-ja mes Beogradit dhe Prishtinës dhe mirëpresim takimin e javës së ardhshëm që është e vetmja mënyre e zgjidhjes së çështjeve të mbetura. Kjo kërkon durim insistim dhe kompromis. Kjo është mundësi për Kosovën që të demostrojë që është palë e përgjegjshme që vepron në mënyrë konstruktive në dobi të sigurisë euroatlantike”- theksoi ai.

Sekretari i NATO-s, gjithashtu tha se me presidenten Osmani, kanë diskutuar për tensionet në veri të Kosovës dhe rëndësinë e prezencës së misionit paqeruajtës të NATO-s.

“Diskutuam për tensionet e fundit në veri të Kosovës dhe rëndësinë e prezencës së misionit paqeruajtës të NATO-s në mandatin e rezolutës 12/44 të Këshillit të Sigurimit të OKB-së. Trupat tanë të KFOR-it janë sulmuar më herët këtë vit duke lënë 93 prej tyre të lënduar, prej tyre disa në masë serioze dhe kjo është plotësisht e papranueshme. Stabiliteti i rajonit dhe siguria e trupave të KFOR-it bëhet nga të gjitha palët që respektojnë zotimet ekzistuese. NATO-ja konsideron këtë të ketë rëndësinë më të lartë dhe kërkon që këto të repsketohen”- tha Stoltenberg

Situata në veri të Kosovës është tensionuar në fund të majit, kur kryetarët e rinj shqiptarë të Zveçanit, Leposaviqit e Zubin Potokut po hynin në ndërtesat komunale, me gjithë rezistencën e banorëve lokalë serbë.

Për shkak të tensioneve në veri, NATO-ja ka rritur numrin e ushtarëve në kuadër të KFOR-it.

Takimi i 14 shtatorit, është i pari që mund të realizohet mes Kurtit dhe Vuçiqit prej rritjes së tensioneve në veri, qysh në fund të majit.

Fillon aplikimi për Global Engineer Girls Kosova

Sponsoruar