Dakordimi i shumë kërkuar për uljen e tensioneve në veri ka mbetur në nivel të rrjeteve sociale, aty ku u njoftua se ai është arritur, në Twitter.
Detajet nga takimi në Bratislavë i zëvendëskryeministrit të Kosovës, Besnik Bislimi me emisarin Miroslav Lajçak janë mbajtur të fshehura për publikun.
Më shumë se 24 orë nga ky diskutim, nuk dihet se çfarë dakordimi është arritur mes tyre.
Dukagjini ka pyetur si Qeverinë e Kosovës, ashtu edhe Bashkimin Evropian. Nga ky i fundit, i ka thënë televizionit se është duke punuar për të kthyer përgjigje në pyetjet e dërguara.
E, mostransparencën e Qeverisë e quan të pakuptimtë profesori i marrëdhënieve ndërkombëtare, Dritëro Arifi.
Madje, ai e vlerëson si skandal pranimin e mundshëm të kërkesave të BE-së vetëm pasi ndaj Kosovës kanë hyrë në fuqi ditë sanksionet.
“Por nga ana tjetër është skandaloze, është palaqo sistem nëse është pranuar në këtë fazë dhe pa asnjë përfitim. Pra atëherë pse i kemi ne sanksionet, kjo është një pyetje shumë legjitime që duhet t’ia bëjë Qeveria e Kosovës vetvetes, pra pse e kemi dërguar vendin në këtë vijë që të marrim sanksione dhe në fund t’i zbatojmë pikat e BE-së pa asnjë përfitim”, ka deklaruar Dritëro Arifi, profesor i marrëdhënieve ndërkombëtare.
Por, ndryshe mendon njohësi tjetër i procesit të dialogut, Gazmir Raci.
Ndonëse nuk dihet akoma se çfarë përmban dakordimi i arritur, ai nuk e vlerëson atë si tërheqje të Kurtit nga kërkesat e tij për rend dhe ligj në veri.
“Besoj që në këtë dakordësinë e re që pritet të ndodhë ka me pasë parasysh edhe kushtet për siguri që zgjedhjet të jenë fer, të lira dhe demokratike. Zgjedhjet për me qenë të lira dhe demokratike natyrisht duhet me pasë kushte të sigurisë”, Gazmir Raci, njohës i procesit të dialogut.
Përmes Twitterit, emisari Lajçak njoftoi se me Bislimin janë dakorduar për hapat e parë drejt shtensionimit të situatës në veri, sipas planit tre pikësh të BE-së të publikuar më 3 qershor.
Ndërsa, zv.kryeministri Bislimi theksoi po ashtu në Twitter se dakord kanë rënë për të siguruar uljen e përshkallëzimit efektiv dhe të përcaktuar me ligj, fokusimin në normalizimin dhe zbatimin e sundimit të ligjit./RTV Dukagjini/
