Lajme

Hungaria s’e mbështet anëtarësimin e Kosovës në KiE, nuk i kontribuon dialogut Kosovë-Serbi

Autori: Gazeta inFokus 15:45 | 18 Shtator 2024

“Hungaria nuk do ta mbështesë anëtarësimin e Kosovës në Këshillin e Evropës”.

Kështu ka deklaruar ministri i Jashtëm i Hungarisë, Peter Szijjarto.

Szijjarto tha se qëndrimi i Hungarisë ka qenë i qartë qysh më parë dhe i njëjti nuk ndryshon.

-Advertisement-

“Ne jemi të rrënjosur për suksesin e dialogut ndërmjet Beogradit dhe Prishtinës, por besojmë se kandidatura e Kosovës për anëtarësim në organizatat ndërkombëtare nuk i kontribuon atij dialogu. Hungaria nuk do të mbështesë pranimin e Kosovës në Këshillin e Evropës”, ka thënë kryediplomati hungarez.

Ai të mërkurën në Budapest është takuar me ministren e Ekonomisë së Serbisë, Adrijana Mesaroviq, me të cilën ka biseduar për përmirësimin e bashkëpunimit ekonomik ndërmjet Serbisë dhe Hungarisë.

Deputetja e Lëvizjes Vetëvendosje Arbëreshë Kryeziu-Hyseni, para disa ditësh ka deklaruar se do të kërkohet ndihma e Hungarisë në lidhje me procesin e anëtarësimit në KiE.

Kjo deklaratë u bë pas takimit me ambasadorin hungarez në Kosovë, Bela Bozsik.

Aktualisht, Hungaria kryeson me presidencën e Bashkimit Evropian.