Me Moton “Shëndeti për të gjithë “sot shënohet Dita Botërore e Shëndetit edhe në Kosovë.

Oleksandr Martynenko udhëheqës i zyrës së Organizatës Botërore të Shëndetësisë në Kosovë, ka thënë se Kosova qëndron më mirë se sa vendet e rajonit për sa i përket imunizimit-vaksinimit, ndërsa duhet të punohet me shumë në fushën e sigurimeve shëndetësore.

“Shëndeti për të gjithë “ është motja e cila fillon shënimin e Ditës Botërore te Shëndetit në Kosovë e që ka për qëllim vetëdijesimin për një prioritet shëndetësor. Personat duhet të investojnë në shëndet, sepse është më e lehtë dhe më e lirë për të parandaluar sëmundjet sesa për t’i trajtuar ato. Kështu ka thënë në një prononcim për Radio Kosovën Oleksandr Martynenko, udhëheqës i zyrës së OBSH-së në Kosovë. Ai tutje ka thënë se zyra e OBSH-së është në përkrahje të institucioneve shëndetësore në Kosovë që t’u ndihmojë në përmirësimin e situatës për sa i përket shëndetin publik.

“Për sa i përket sistemeve shëndetësore në Kosovë ballafaqoheni me sfida të njëjta sikurse vendet e tjera të Ballkanit Perëndimor por ne si zyrë, jemi këtu për t’i përkrahur institucionet shëndetësore për të përmirësuar situatën për sa i përket shëndetit publik. Në disa indikatorë Kosova qëndron më mirë për sa i përket shëndetit publik në krahasim me vendet e Ballkanit Perëndimor e në disa qëndron me dobët”, deklaroi Martynenko.

Udhëheqës i zyrës së OBSH-së në Kosovë, Oleksandr Martynenko, tutje ka potencuar se Kosova qëndron mirë me imunizimin- vaksinimin në krahasim me vendet e rajonit ndërsa ka mangësi në fushën e sigurimeve shëndetësore.

“Për sa i përket vaksinimit dhe imunizimit të rregullt si dhe menaxhimit dhe monitorimin të sëmundjeve ngjitëse, Kosova qëndron mirë. Kurse fusha që ka nevojë të zhvillohet më mirë në Kosovë ka të bëjë më sigurimet shëndetësore dhe mbulimin financiar për shërbime shëndetësore, në mënyrë që të sigurohet që kushdo që ka nevojë për shërbime shëndetësore të mos mbes pa to si pasojë e mungesës financiare”, tha ai.

Martynenko, tutje tha se një fushë e cila duhet të adresohet në mënyrë intensive është edhe rezistenca antimikrobike që ka të bëjë me konsumimin dhe marrjen e antibiotikeve pa përshkrim të mjekut. Ajo duhet të merret vetëm me përshkrim të mjekut dhe duhet të menaxhohet më mirë.

EURO 2024 dhe Serie A, dy ekskluzivitetet absolute të Artmotion këtë vit

Sponsoruar