Lajme

Zvicra nuk e bën të detyrueshëm sigurimin nga tërmetet

Autori: Gazeta inFokus 16:17 | 04 October 2026

Parlamenti zviceran ka refuzuar edhe një herë propozimin për vendosjen e një sistemi të detyrueshëm për mbulimin e dëmeve nga tërmetet

Pronarët e ndërtesave në Zvicër do të vazhdojnë të mos kenë detyrim kombëtar për sigurimin nga tërmetet. Parlamenti ka hedhur poshtë një propozim të Këshillit Federal që synonte krijimin e një mekanizmi kombëtar për financimin e rindërtimit pas një tërmeti të madh.

Çështja e sigurimit nga tërmetet është diskutuar prej dekadash në Bernë. Sipas World Radio Switzerland, më shumë se 25 përpjekje për krijimin e një zgjidhjeje të tillë kanë dështuar deri më tani. Zvicra mbetet ndër vendet evropiane ku nuk ekziston një mbulim i detyrueshëm kombëtar për dëmet sizmik, transmeton albinfo.ch.

-Advertisement-

Të dhënat e Shërbimit Sizmologjik Zviceran tregojnë se vetëm rreth 15% e pronarëve të shtëpive kanë sigurim për dëmet e shkaktuara nga tërmetet. Kjo do të thotë se, në rast të një tërmeti të fuqishëm, një pjesë e madhe e pronarëve mund të mbeten pa kompensim të plotë për dëmet.

Propozimi i Këshillit Federal parashihte që, pas një tërmeti të madh, pronarët e ndërtesave të mund të detyroheshin të kontribuonin deri në 0.7% të shumës së sigurimit të ndërtesës. Sipas autoriteteve federale, ky mekanizëm do të mund të siguronte rreth 22 miliardë franga për mbulimin e dëmeve, pa pasur nevojë për pagesën e një premie vjetore.

Rreziku sizmik nuk është i njëjtë në të gjithë vendin. Rajone të caktuara, përfshirë pjesë të Valais dhe Bazel, konsiderohen më të ekspozuara. Pas vendimit të fundit, pronarët që duan mbulim kontraktual ndaj dëmeve nga tërmetet duhet të kërkojnë zgjidhje private të sigurimit.

Udhëto Oslo – Prishtinë çdo javë me PrishtinaTickets
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy