Të hënën në rrjetet sociale u publikuan disa pamje të rënda ku shihet qartë se si një grua në pikë të ditës sulmohet nga qentë endacakë në lagjen C në Prishtinë. E brenda ditës menjëherë u publikuan edhe pamje të tjera ku një grua tjetër u sulmua nga qentë në lagjen Dragodan në kryeqytet.

E këto dy raste nuk janë të vetmet kjo pasi problemi me qentë endacakë është qysh moti dhe po vazhdon ende, e sulmet e tyre ndaj njerëzve janë pothuajse të përditshme.

Një reagim pas publikimit të këtyre pamjeve pati dje edhe i pari i kryeqytetit, Përparim Rama, i cili tha se problemi me qentë endacakë nuk mund të zgjidhet vetëm nga komuna e Prishtinës e madje kërkoi bashkëveprim në këtë aspekt edhe nga qeveria dhe komunat e tjera.

Ndërsa sot gjatë ditës ai publikoi raportin e tij të punës që ka bërë sipas tij në komunë që nga fillimi i mandatit.

Ai punën e tij për qentë endacakë po e konsideron si të jashtëzakonshme, dhe në raport ka shpalosur projektet e tij dhe ato te nisura nga ish kryetari Shpend Ahmeti.

“Është bërë një punë e jashtëzakonshme për trajtimin e qenve endacak, me ç’rast janë ndërmarrë veprimet si në vijim:

Janë duke u zhvilluar procedurat finale për ndërtimin e Qendrës së përkohshme për trajtimin e qenve endacak në Hajvali”, thuhet në raportin e Komunës së Prishtinës.

Gjithashtu, në këtë raport janë përmendur edhe veprimet tjera që janë ndërmarrë në kuadër të trajtimit të qenve endacak në kryeqytet.

“Ndarja e 10 hektarëve për ngritjen e “Strehimores për Kafshë” në Slivovë; Është hartuar strategjia 10 pikëshe për qentë endacak”, thuhet në raport.

Po ashtu, është bërë e ditur se Komuna e Prishtinës ka organizuar konferencën rajonale për bashkëpunim ndër-komunal, e cila qëllim ka pasur gjetjen e një zgjidhje afatgjatë për qentë endacak.

“Koordinimi i vazhdueshëm me AUVK për fillimin e regjistrimit të qenve endacak; Është nënshkruar marrëveshja me operatorët e jashtëm KSVL (kapje, sterilizim, vaksinim dhe lëshim); Është bërë ngritja e pikave ushqyese për qentë endacak nga 5 në 23 sosh”, thuhet tutje në raportin e komunës.

Mirëpo se kur do të finalizohet kjo punë “e jashtëzakonshme” e Përparim Ramës për problemin me qentë endacakë dhe se kur do të fillojë që kjo punë të vërehet edhe në terren mbetet të shihet./Gazeta Infokus/

Spektakli i Vitit, Ekskluzivisht në Artmotion – BBVK3!

Sponsoruar