Ekonomi

Qytetarët ankohen, Policia mohon mosfunksionimin e sistemit të pagesave të gjobave në trafik

Autori: Sylejman Sylejmani 15:21 | 16 September 2019

Sh.B. kishte paguar tri dënime për kundërvajtje në trafikun rrugor, të cilat i ishin shqiptuar nga Policia e Kosovës.

Megjithatë, ai përkundër që e kishte kryer pagesën, emri i tij nuk ishte fshirë nga sistemi i pagesave të kundërvajtjeve në trafik të policisë, shkruan Gazeta inFokus.

Në këtë sistem, Sh.B. figuronte në listën e personave që nuk i kanë paguar dënimet.

-Advertisement-

Sipas asaj që ka treguar për Gazetën inFokus, kjo gjë i ka ndodhur edhe më parë, prandaj i ka mbajtur si dëshmi dokumentet që tregojnë se e ka paguar dënimin.

Në këtë mënyrë, duke u lajmëruar në njërin prej stacioneve qendrore të Policisë ai e ka hequr emrin e tij nga ky sistem.

Megjithatë, përkundër raportimit të disa rasteve të tilla, Policia e Kosovës në një prononcim për Gazetën inFokus kanë treguar se sistemi është duke funksionuar shumë mirë.

“Është bërë ndërlidhja e sistemeve të pagesave të kundërvajtjeve në trafik me UNIREF të gjenerueshëm në mes të Policisë dhe institucioneve të autorizuara që kryejnë këto shërbime, me ç’rast evidentimi në sistem është duke u bërë në mënyrë automatike/online, ku deri më tani një sistem i tillë është duke funksionuar dhe nuk ka nevojë që kundërvajtësit t’i sjellin dëshmitë në polici”, thuhet në përgjigje.

E në rast se qytetarëve u humbin dëshmitë e pagesave, sipas tyre duhet të drejtohen tek institucioni ku e kanë kryer pagesën për të marr dëshminë se e kanë paguar gjobën dhe të njëjtën ta dërgojnë në stacionin më të afërm të policisë.

Aty, sipas tyre do të bëhet verifikimi edhe editimi në sistem.

Megjithatë, përkundër deklarimit se sistemi po funksionon mirë, në polici nuk kanë treguar se sa është numri i rasteve kur qytetarët e paguajnë dënimin dhe emri i tyre nuk hiqet nga sistemi.

Kujtojmë se edhe më parë është raportuar për probleme të tilla. /Gazeta inFokus

Subscribe në YouTube: GAZETA INFOKUSI
TEB sjellë edhe kartelën prestigjioze VISA Infinite

Të tjera