Ekonomi

QKUK nuk merr mësim, jep tender gati 1 milion euro për pastrimin e Klinikave, sërish nuk përfill konkurrencën

Autori: Gazeta inFokus 10:47 | 06 Shkurt 2024

Qendra Klinike Universitare e Kosovës ka nënshkruar kontratë në vlerë 919 mijë e 595 euro për “pastrimin e hapësirave të brendshme të QKUK-së”, më procedurë të negociuar.

E këto para për pastrimin e këtij institucioni shëndetësor do t’i marrë kompania LAGUNA SH.P.K me pronar Bastri Alshiqin.

Shuma e paraparë e kësaj kontrate ishte 920 mijë euro derisa vlera më e ulët më të cilën u nënshkrua është 919 mijë 595 euro.

-Advertisement-

Derisa nuk është saktësuar nëse në këtë shumë është i përfshirë pastrimi i brendshëm i të gjitha klinikave të QKUK-së, kohëzgjatje e kësaj kontrate është 6 muaj.

Kjo nuk është hera e parë që ky institucion publik shëndetësor në vend nënshkruan kontrata të majme për pastrim të objekteve duke mos e përfillu konkurrencën.

Edhe kjo kontratë është zhvilluar me procedura negociuese dhe pa tender të hapur.

Raste të tillë të tenderëve në të kaluarën janë bllokuar në Organin Shqyrtues të Prokurimit.

QKUK-ja vitin e kaluar kishte njoftuar se tenderi 7 milionë euro për pastrimin e këtij institucioni është pezulluar nga OSHP-ja për shkak të ankesa të shumta pasi i njëjti po ashtu ishte dhënë me procedurë të negociuar.

“Vendim mbi pezullimin e Aktivitetit të Prokurimit për ‘Pastrimin e Hapësirave të brendshme, të objekteve të QKUK-së’ deri në një vendim të OSHP”, thuhej në vendimin për anulim te Nexhat Halilit, shef i Prokurimit në QKUK.

Qendra Klinike Universitare e Kosovës kishte shpallur tender për pastrimin e hapësirave me vlerë të parashikuar 7 milionë e 130 mijë Euro./Gazeta Infokus/