Lajme

Paga minimale në BE, Parlamenti Evropian gati draftin për mbrojtjen e punëtorëve

Autori: Gazeta inFokus 23:10 | 13 September 2022

Parlamenti Evropian në Strasburg debatoi të ardhmen e rrogave minimale në Evropë. Ligjvënësit ekzaminuan një marrëveshje të negociuar mes Parlamentit dhe Këshillit Evropian në qershor.

Një votim është planifikuar për të mërkurën, nga i cili pritet një rezultat pozitiv. Disa ligjvënës e cilësuan propozimin një sinjal të fortë në kohë krize.

“Kjo direktivë është një hap i rëndësishëm për të frenuar varfërinë që kemi në Bashkimin Evropian. Ka shumë njerëz që luftojnë për mbijetesë. Ata kanë qenë edhe përpara se të flisnim për inflacionin, apo për rritjen e çmimeve të energjisë. Ndaj është me rëndësi të bëjmë një ndryshim strukturor, nga i cili do të përfitojnë miliona qytetarë”, thotë Ska Keller, euro-deputete, të Gjelbrit.

Drafti mbi të cilin është rënë dakord synon të sigurojë që pagat minimale në vendet e BE-së të garantojnë standarde të pranueshme jetese për punëtorët. Ai do të aplikohet për të gjithë punëtorët me kontratë apo me marrëdhënie pune.

“Ky është fundi i një epoke. Për dekada me radhë vendet evropiane kanë konkurruar me njëri-tjetrin, ku punëtorët janë më të lirë, ku janë më të cenueshëm dhe ku janë avantazhet. Ky është fundi i një epoke ku konkurrenca matej me punë krahu të lirë dhe të cenueshme”, shprehet Klara Dobrev, euro-deputete hungareze, nga Social-Demokratët.

Sipas draftit, shtetet anëtare do të duhet të shqyrtojnë nëse pagat minimale ekzistuese janë të përshtatshme, duke marrë parasysh detyrimin për të vëzhguar nëse punëdhënësit aplikojnë rregullat e reja./Euronews.al/

Të tjera