Ekonomi

Murati për bllokimin e Kuvendit: Po ndikon edhe në dorëzimin me kohë të Kornizës së Shpenzimeve

Autori: Gazeta inFokus 13:08 | 29 April 2025

Ministri në detyrë i Financave, Hekuran Murati, ka reaguar pas dështimit të tetë me radhë për konstituimin e Kuvendit të Kosovës.

Ai ka paralajmëruar se kjo situatë po ndikon negativisht edhe në proceset tjera institucionale, përfshirë dorëzimin e Kornizës Afatmesme të Shpenzimeve, shkruan Gazeta Infokus.

Në një postim në rrjete sociale, Murati ka theksuar se kjo kornizë, e cila është një dokument i rëndësishëm për planifikimin buxhetor të vendit, duhet t’i dorëzohet Kuvendit jo më larg se 30 prilli.

-Advertisement-

“Moskonstituimi i Kuvendit ka pasoja edhe në proceset tjera. Në mungesë të një Kuvendi funksional, Qeveria e ka të pamundur të dorëzojë Kornizën Afatmesme të Shpenzimeve, e cila parashihet që t’i dorëzohet Kuvendit jo më larg se data 30 prill,” ka shkruar Murati, raporton Gazeta Infokus.

Ai ka përmendur edhe vonesat në funksionimin e Komisionit për Grante Komunale, për shkak të mungesës së një Kuvendi të konstituuar.

“Ngjashëm është puna edhe me Komisionin për Grante Komunale, ku ligji kërkon pjesëmarrjen e Kryetarit të Komisionit Parlamentar për Buxhet. Në mungesë të Kuvendit funksional, nuk ka as Komision për Buxhet dhe s’ka kush të marrë pjesë në Komisionin e Granteve – kjo po e vonon edhe ndarjen e granteve komunale,” ka shtuar ai.

Murati u ka bërë thirrje partive opozitare që të tërhiqen nga bllokada dhe të kontribuojnë në konstituimin e Kuvendit sa më parë.

“Prandaj është e domosdoshme që partitë opozitare të heqin dorë nga bllokada dhe të ndihmojnë konstituimin e Kuvendit sa më parë,” ka përfunduar Murati./Gazeta Infokus