Kosova ka shpenzuar hiç më pak se 128 milionë e 19 mijë e 585 euro për import të energjisë elektrike vetëm gjatë gjashtë muajve të parë të vitit 2026.

Të dhënat nga Dogana e Kosovës për periudhën janar-qershor, të analizuara nga Gazeta Infokus, të bazuara në regjistrat e importit për kodin tarifor të energjisë elektrike (2716000000), tregojnë se nga janari deri në fund të qershorit në vend janë importuar 1 milion e 193 mijë e 288.04 MWh energji elektrike.

Pavarësisht këtyre shifrave gjigante dhe miliona eurove të shpenzuara për të siguruar energji nga jashtë, qytetarët sërish nuk i kanë shpëtuar reduktimeve të energjisë elektrike.

-Advertisement-

Gjatë kësaj periudhe, në shumë raste janë raportuar ndërprerje dhe kufizime në furnizim, duke ngritur pikëpyetje se si, përkundër importeve rekord, sistemi energjetik nuk pati stabilitet dhe nuk ka arritur të garantojë furnizim të pandërprerë për konsumatorët.

Shifrat janë alarmante jo vetëm për vlerën financiare, por edhe për faktin se importi ka vazhduar në nivele shumë të larta edhe gjatë muajve pranverorë dhe në prag të verës, periudhë kur zakonisht konsumi bie krahasuar me muajt e dimrit dhe pritet prodhim më i favorshëm vendor. Në vend të një uljeje të varësisë nga importi, të dhënat tregojnë se Kosova ka vazhduar të mbështetet në tregjet e jashtme për të përmbushur nevojat për energji elektrike.

 

Mbi 35.8 milionë euro vetëm në janar

Muaji janar ishte më i kushtueshmi për importin e energjisë elektrike.

Gjatë këtij muaji u importuan 293,207.09 MWh, me një vlerë prej 35,806,685.09 euro.

Importi më i madh erdhi nga Shqipëria, ndërsa Maqedonia e Veriut ishte importuesi i dytë më i madh gjatë muajit.

Shqipëria – 173,880.09 MWh (20,275,436.26 euro)

 

Shkurti – mbi 21 milionë euro

Edhe gjatë shkurtit importi mbeti në nivele të larta.

Kosova importoi 166,070 MWh, me një kosto prej 21,081,077.18 euro.

Dy shtetet kryesore ishin:

• Maqedonia e Veriut – 82,806 MWh (11,152,028.30 euro)
• Shqipëria – vendi i dytë me sasinë më të madhe të energjisë së importuar.

Marsi – mbi 16.6 milionë euro

Në muajin mars janë importuar 184,615.85 MWh, me një vlerë prej 16,689,268.33 euro.

Importi dominohet nga:

• Shqipëria – 123,089.85 MWh (10,307,922.47 euro)
• Maqedonia e Veriut – renditet e dyta.

 

Afro 17 milionë euro edhe në prill

Në prill Kosova importoi 150,130.77 MWh, me një vlerë prej 16,866,538.25 euro.

Dy furnizuesit kryesorë ishin:

• Shqipëria – 71,020.77 MWh (8,137,216.03 euro)
• Maqedonia e Veriut – vendi i dytë.

 

Maji – mbi 15.7 milionë euro

Edhe pse temperaturat u rritën dhe vendi hyri në sezonin pranveror, importi nuk u ndal.

Gjatë muajit maj u importuan 162,362.92 MWh, me një kosto prej 15,710,488.98 euro.

Importi u kryesua nga:

• Maqedonia e Veriut – 77,305 MWh (7,359,414.69 euro)
• Shqipëria – 69,139.92 MWh (6,636,480.63 euro)

 

Në prag të verës mbi 21.8 milionë euro import – Qershori

Shifrat bëhen edhe më shqetësuese në muajin qershor.

Në muajin kur konsumi zakonisht është më i ulët sesa gjatë dimrit, Kosova importoi 236,901.41 MWh, duke paguar 21,865,528.15 euro.

Importi më i madh erdhi nga:

• Shqipëria – 112,610.41 MWh (10,043,298.24 euro)
• Maqedonia e Veriut – furnizuesi i dytë më i madh.

 

Mbi 128 milionë euro në gjashtë muaj

Në total, nga janari deri në fund të qershorit 2026:

• janë importuar 1,193,288.04 MWh energji elektrike;
• janë shpenzuar 128,019,585.98 euro.

 

Importi nga Serbia nuk u ndal as në gjysmën e parë të vitit

Përkundër faktit se pjesa dërrmuese e energjisë elektrike është importuar nga Shqipëria dhe Maqedonia e Veriut, të dhënat e analizuara nga Gazeta Infokus tregojnë se Kosova ka importuar energji elektrike edhe nga Serbia gjatë vitit 2026.

Edhe pse sasitë janë dukshëm më të vogla krahasuar me shtetet e tjera, importi nga Serbia nuk ka munguar, duke u regjistruar në tre muaj të ndryshëm të gjysmës së parë të vitit.

Sipas të dhënave, gjatë kësaj periudhe nga Serbia janë importuar gjithsej 820 MWh energji elektrike, me një vlerë prej 91,692.39 euro.

Importi sipas muajve është si vijon:

• Shkurt – 440 MWh, në vlerë prej 50,260.39 euro;
• Mars – 240 MWh, në vlerë prej 29,952 euro;
• Qershor – 140 MWh, në vlerë prej 11,480 euro.

Ndërsa në muajt janar, prill dhe maj, sipas regjistrave të importit të energjisë elektrike, nuk figuron import nga Serbia.

Kjo analizë tregon se pjesa më e madhe e energjisë është siguruar nga Shqipëria dhe Maqedonia e Veriut, të cilat kanë qenë burimet kryesore të importit gjatë gjithë periudhës.

Shifrat ngrenë pikëpyetje serioze për sigurinë energjetike të Kosovës dhe aftësinë e sistemit vendor për të mbuluar nevojat me prodhim të brendshëm. Veçanërisht shqetësues mbetet fakti se edhe në muajt pranverorë dhe në prag të verës, kur pritet të ketë më pak presion mbi sistemin energjetik, importi vazhdon të kushtojë dhjetëra milionë euro.

Nëse kjo prirje vazhdon edhe gjatë pjesës së dytë të vitit, fatura e importit të energjisë elektrike për vitin 2026 mund të arrijë në qindra milionë euro.

 

Përkundër importeve rekord, Kosova vazhdon ta lërë pezull ofertën amerikane për gazin natyror

Teksa vetëm në gjashtë muajt e parë të vitit 2026 Kosova ka shpenzuar mbi 128 milionë euro për importin e energjisë elektrike, në anën tjetër ende nuk ka një vendim të qartë nga Qeveria e Kosovës, për t’iu bashkuar nismës amerikane për furnizim me gaz natyror të lëngshëm (LNG), një projekt që Shtetet e Bashkuara e kanë promovuar vazhdimisht si një mundësi për të rritur sigurinë energjetike të Kosovës dhe për të diversifikuar burimet e furnizimit.

Në muajt e fundit, Ambasada e Shteteve të Bashkuara në Prishtinë ka përsëritur disa herë thirrjen që Kosova t’i bashkohet projekteve rajonale të gazit amerikan. Në një opinion të publikuar në fillim të qershorit, e Ngarkuara me Punë e SHBA-së në Kosovë, Anu Prattipati, theksoi se përballë sfidave strukturore në sektorin energjetik, Kosova duhet të bëhet pjesë e projekteve amerikane të gazit natyror në Ballkan, duke vlerësuar se kjo do të siguronte burime më të qëndrueshme energjie dhe do të forconte sigurinë energjetike afatgjatë të vendit.

Megjithatë, deri më tani, nuk ka sinjale se Qeveria e Kosovës është duke e çuar përpara këtë iniciativë me hapa konkretë. Përkundrazi, në diskursin publik është vërejtur një qasje hezituese ndaj projektit, ndërsa vendi vazhdon të mbështetet në importin e energjisë elektrike, duke paguar dhjetëra milionë euro çdo muaj në tregjet rajonale./Gazeta Infokus

5 vitet e Kurtit kushtuan më shumë se 20 vitet e pasluftës: 838 milionë euro për import të rrymës në qeverisjen e Albin Kurtit

Düsseldorf–Prishtinë, dy fluturime në ditë – rezervoni me PrishtinaTickets

Sponsoruar

-Advertisement-