Lajme

Incidentet në Veri, Sveçla: Serbia mbron kriminelët që kryejnë akte edhe terroriste

Autori: Gazeta inFokus 19:46 | 02 April 2023

Ministri i Punëve të Brendshme, Xhelal Sveçla, ka thënë se Serbia mbron dhe glorifikon kriminelët që kryejnë akte edhe terroriste në Kosovë.

Përmes një postimi në Facebook, Sveçla të dielën ka shkruar për Milovan Bozovic, i njohur për institucionet e sigurisë së Kosovës.

“Milovan Bozovic është një i tillë. Figurë e njohur për institucionet e sigurisë, si kriminel, pjesëtar aktiv i strukturës ilegale “Mbrojtja Civile” dhe grupeve të tjera kriminale. I njëjti po konsiderohet si hero për strukturat e Serbisë që e kanë dirigjuar. Për shkathtësitë e treguara në veprime kriminale ai është edhe ndër bashkëpunëtorët e ngushtë të Milan Radoiçiq“, ka shkruar Sveçla.

-Advertisement-

Më tutje Sveçla rreth Bozovicit ka thënë se ”përveç djegies së veturave në veri, plagosjes së pjesëtarëve të Policisë së Kosovës, dëmtimit të infrastrukturës sonë kritike, kalimit ilegal të kufirit, rrahjeve të qytetarëve serbë, haraçit dhe zjarrvënies së bizneseve lokale, ai ka marrë pjesë edhe në sulmet ndaj shtëpive dhe pronave të pjesëtarëve serbë të Forcës së Sigurisë së Kosovës si dhe dyshohet për vrasjen e një pjesëtari të EULEX“.

”Çdo qenie njerëzore, jo thjesht zyrtarë publik apo politik, do të ishte distancuar e do të dënonte këto veprimtari për të cilat akuzohet Bozovic. Por jo dhe krerët e institucioneve të Serbisë dhe ata të Listës Serbe. Madje, duket se arrestimi dhe dërgimi i tij para drejtësisë ka lëkundur themelet e Listës Serbe dhe zyrës së ashtuquajtur për Kosovë“.

”Siç u pa dje, ata po përdorin gjuhë kërcënuese publikisht. Madje, thërrasin për kryengritje dhe mosbindje për shkak të arrestimit të një recidivisti kriminal. Mbrëmë pas këtyre thirrjeve janë sulmuar pjesëtarët e policisë sonë me shok bomba në Mitrovicë të Veriut“, ka shkruar Sveçla ndër tjerash.

Ditëve të fundit janë raportuar djegje të veturave të cilat mbajnë targat legale RKS.

Gjatë viteve të fundit tensionet në veri janë shtuar përmes grupeve kriminale në Veri.

Subscribe në YouTube: GAZETA INFOKUSI