Deputeti i Lidhjes Demokratike të Kosovës, Avdullah Hoti, ka kritikuar Qeverinë për gjendjen ekonomike në vend, duke theksuar se gjatë pesë viteve të fundit kostoja e jetesës për qytetarët është rritur ndjeshëm.

Përmes një reagimi, Hoti ka publikuar një tabelë me çmimet e produkteve të konsumit familjar për tetorin e viteve 2021 dhe 2026, duke iu referuar të dhënave të Agjencisë së Statistikave të Kosovës (ASK).

Sipas tij, gjatë kësaj periudhe, rritja mesatare e çmimeve të produkteve të paraqitura në tabelë ka arritur në 45%, ndërsa disa produkte bazë janë shtrenjtuar deri në 84%.

-Advertisement-

“Buxheti nuk matet me shifrat në letër, por me cilësinë e jetës së qytetarëve. Në pesë vitet e fundit, sipas ASK-së, kostoja e jetesës është rritur mesatarisht për 45%, ndërsa për shumë produkte të konsumit familjar çmimet gati janë dyfishuar”, ka deklaruar Hoti.

Bazuar në tabelën e publikuar, çmimi i domateve është rritur nga 0.92 euro në tetor të vitit 2021 në 1.69 euro në tetor të vitit 2026, apo 84%. Specat e pa djegës janë shtrenjtuar për 80%, ndërsa mishi i gjedhit pa eshtra për 79%.

Rritje të konsiderueshme kanë pësuar edhe çmimet e mishit të pulës, me 76%, mishit të viçit me 73%, kafesë së bluar me 68% dhe druve të zjarrit me 58%.

Po ashtu, sipas këtyre të dhënave, buka e bardhë është shtrenjtuar për 47%, mielli i grurit për 47%, sheqeri për 42%, ndërsa qumështi për 35%.

Hoti ka theksuar se rritja e çmimeve po ndikon drejtpërdrejt në mirëqenien e familjeve kosovare.

“Kur çmimet dyfishohen, jeta e qytetarëve bëhet më e vështirë. Propaganda për sukses ekonomik nuk e mbush shportën e konsumit të familjeve!”, ka shkruar ai.

Ish-kryeministri ka kritikuar edhe mënyrën se si Qeveria e prezanton gjendjen ekonomike, duke thënë se shifrat buxhetore nuk e pasqyrojnë domosdoshmërisht realitetin me të cilin përballen qytetarët.

“Qeveria mund të prezantojë shifra miliardëshe, por realiteti matet me koston e konsumit familjar, matet me koston që çdo vikend familja paguan në arkën e marketeve”, ka deklaruar Hoti.

Ai ka kërkuar që gjatë diskutimeve në Kuvend për buxhetin e viteve 2027–2029, vëmendja të përqendrohet te kostoja e jetesës, përgjegjësia për rritjen e saj dhe masat që mund të ndërmerren për lehtësimin e barrës financiare të qytetarëve.

“Debati që duhet të bëhet në Kuvend me rastin e diskutimit të buxhetit 2027–2029 duhet të përqendrohet në këto çështje: Çfarë ka ndodhur me koston e jetës së qytetarëve? Kush mban përgjegjësi për këtë dhe çfarë mund të bëhet për të lehtësuar këtë barrë?”, theksoi ai.

Udhëto Oslo – Prishtinë çdo javë me PrishtinaTickets

Sponsoruar

-Advertisement-